مہاراشٹر کے اورنگ آباد شہر میں رضا اکادمی کی جانب سے بارہ نومبر کو بند کا اعلان کیا گیا ہے۔ مسلم پرسنل لا بورڈ سمیت تمام ملی تنظیموں کی جانب سے معلنہ بند کی تائید و حمایت مل رہی ہے۔ یہ بند تریپورہ میں پیغمبر اسلامؐ کی شان میں گستاخی کے خلاف منایا جائے گا۔
رضا اکادمی نے بارہ نومبر کو اورنگ آباد بند کی کال دی ہے۔ اورنگ آباد کی تمام ملی تنظیموں نے اس بند کی حمایت کا اعلان کیا ہے۔ اس سلسلے میں رضا اکادمی کے دفتر پر ایک کل جماعتی میٹنگ ہوئی، اس میٹنگ میں آل انڈیا مسلم پرسنل لا بورڈ، جمعیت العلمائے ہند، جماعت سلامی ہند، آل انڈیا امام کونسل، اہل سنت والجماعت، تحریک صدائے حق اور دیگر تنظیموں کے نمائندوں نے شرکت کی۔
انھوں نے تریپورہ میں مذہبی مقامات کی بے حرمتی اور پیغمبر اسلام کی شان میں گستاخی کی مذمت کی. اس میٹنگ میں متفقہ طور پر رضا اکادمی کے فیصلے کی تائید و حمایت کا اعلان کیا گیا۔ اکادمی کے ذمہ داروں نے کہا کہ یہ بند پرامن رہے گا۔