'ہم ونچت اگھاڑی سے اتحاد کے لیے تیار ہیں لیکن۔۔۔'

ریاست مہاراشٹر کے ضلع اورنگ آباد کے رکن پارلیمان و مجلس اتحاد المسلمین کے ریاستی صدر امتیاز جلیل نے کہا کہ ہم اسمبلی انتخابات میں ونچت اگھاڑی سے اتحاد کے متمنی ہیں لیکن پرکاش امبیڈکر کی ہٹ دھرمی کی وجہ سے اتحاد کا راستہ دکھائی نہیں دے رہا ہے۔

الیکشن کمیشن آف انڈیا نے مہاراشٹر اسمبلی انتخابات کی تاریخ کا اعلان کردیا ہے، 21 اکتوبر کو ووٹنگ ہوگی جبکہ نتائج 24 اکتوبر کو ظاہر کئے جائیں گے، اس سلسلے میں اورنگ آباد سے ایم آئی ایم کے رکن پارلیمان امتیاز جلیل نے پریس کانفرنس میں کہا کہ وہ اسمبلی انتخابات میں ونچت اگھاڑی سے اتحاد کے متمنی ہیں لیکن پرکاش امبیڈکر بات کرنے کے لیے راضہ ہی نہیں ہیں۔

انہوں نے کہا کہ ایم آئی ایم، ونچت اگھاڑی سے اتحاد کے لیے تیار ہے، بات صرف اس بات پر معلق ہے کہ بالاصاحب امبیڈکر کو ایم آئی ایم سربراہ کوایک فون کرنا چاہیے، امتیاز جلیل نے مراٹھواڑہ مکتی سنگرام پر بھی بیباکانہ انداز میں اپنا موقف رکھا جبکہ اسی کے ساتھدیگر کئی امور پر بھی روشنی ڈالی۔

ایم آئی ایم رکن پارلیمان امتیاز جلیل نے پریس کانفرنس میں واضح انداز میں کہا کہ عوام کی اکثریت ایم آئی ایم، ونچت اتحاد کی متمنی ہے اور ریاست میں اس اتحاد کو ایک سیاسی متبادل کے طور پر دیکھا جارہا ہے اور ہماری درخواست یہ ہے کہ بالا صاحب ایک فون اسدالدین اویسی کو کردیں تو اتحاد پھر سے مضبوط ہوسکتا ہے۔

انہوں نے کہا کہ ایڈوکیٹ پرکاش امبیڈکر مجھ سے بات کرنے کے لیے تیار ہی نہیں ہیں اگر مجھ سے اگر کوئی غلطی ہوئی تو میں ان کے گھر جاکر معذرت خواہی کے لیے تیار ہوں۔

واضح رہے کہ مہاراشٹر کی سیاست میں ونچت اگھاڑی اور ایم آئی ایم اتحاد کے مابین اتحاد کو کافی اہم تصور کیا جارہا تھا جبکہ اس اتحاد پر ابھی تک مطلع صاف نہیں ہوا ہے اور اتحاد ٹوٹنے کے معاملے میں امتیاز جلیل پر عجلت کا بھی الزام ہے لیکن اب امتیاز جلیل کے موقف میں نمایاں تبدیلی دیکھی جا رہی ہے، امتیاز جلیل کا کہنا ہےکہ محض ایک فون کال سے معاملہ حل ہوسکتا ہے لیکن انہوں نے یہ بات بھی واضح کی کہ اگر پرکاش امبیڈکر آٹھ سیٹوں پر بضد رہے تو ہمارے پاس کوئی متبادل نہیں ہوگا۔

واضح رہے کہ مہاراشٹرا اسمبلی انتخابات 2019 میں ایم آئی ایم اور ونچت اگھاڑی کے درمیان اتحاد کے امکانات معدوم ہوتے نظر آرہے ہیں جبکہ امتیاز جلیل کا کہنا ہے کہ ونچت اگھاڑی کے صدر پرکاش امبیڈکر، ایم آئی ایم کو آٹھ سے ذیادہ سیٹیں دینے تیار نہیں ہیں جبکہ ایم آئی ایم نے 2014 کے اسمبلی انتخابات میں 24 امیدوار اتارے تھے اور دو نشستوں پر اسے کامیابی ملی تھی لیکن اب ایم آئی ایم محض آٹھ سیٹوں پر کیسے اکتفا کرے گی۔