تھانے: آنگن واڑی ملازمہ زیرِ حراست

کورونا کے دوران بچوں کو دی جانے والی غذا میں بدعنوانی کے الزام میں تھانے ضلع کونسل کی آنگن واڑی خاتون سپروائزر کو حراست میں لیا گیا ہے۔

تھانے ضلع کونسل کی سرکاری ریلیز کے مطابق خفیہ اطلاع کی بنیاد پرمحکمہ خواتین بہبود اور پولیس نے ہفتے کی رات چھاپہ مارا اور آنگن واڑی کے بچوں کو تقسیم کئے جانے والے ڈرائی فوڈ کو اپنے گھر لے جاتے ہوئے سپروائزر کو رنگے ہاتھوں پکڑ لیا گیا۔ ریلیز میں بتایا گیاکہ ضبط شدہ اشیاء میں دال ، چنے ، تیل ، گندم ، چاول ، نمک ، ہلدی وغیرہ کے پیکٹ تھے ، جن کی قیمت 59،813 روپے لگائی گئی۔

پولیس نے بتایا کہ ملزمہ سپروائزر کے خلاف تعزیرات ہند کی دفعہ 409 اور 420 کے تحت معاملہ درج کیا گیا ہے۔ ادھر تھانے ڈسٹرکٹ کونسل کے چیف ایگزیکٹو آفیسر ہیرا لال سونووال نے بتایا کہ اس جرم میں ملوث افراد کے خلاف فوری کارروائی کی گئی ہے۔ انہوں نے کہا ، ’’میں نے انتظامی کارروائی کرنے کی ہدایت دی ہے ‘‘ ۔ اگر کسی نے کوئی غلط کام کیا ہے تو اس کے خلاف سخت کارروائی کی جائے گی۔