ایم آئی ایم رہنما کی مسلم طبقہ سے متحد ہونے کی اپیل

بابری مسجد انہدام کیس کا فیصلہ آنے کے بعد مجلس اتحاد المسلمین کے رکن پارلیمان سید امتیاز جلیل نے کہا ہے کہ مسلمانوں کے آپسی انتشار کی وجہ سے یہ فیصلہ سنایا گیا ہے۔

مہاراشٹر کے پارلیمانی حلقہ اورنگ آباد سے منتخب ایم آئی ایم کے رکن پارلیمان امتیاز جلیل نے مسلمانوں سے متحد ہونے کی اپیل کرتے ہوئے کہا کہ اب وقت آگیا ہے کہ مسلمان اپنی قیادت منوائیں۔

بابری مسجد انہدام کیس کے فیصلے پر ردعمل ظاہر کرتے ہوئے انھوں نے کہا ہے کہ فرقہ پرست جماعتیں جانتی ہیں ہے کہ مسلم طبقہ بٹا ہوا ہے اس لیے اس طرح کے واقعات پیش آرہے ہیں اور جب تک مسلمان متحد نہیں ہوں گے تب تک اس طرح کے واقعات پیش آتے رہیں گے۔

رکن پارلیمان نے کہا کہ آج کا یہ فیصلہ کانگریس اور نام نہاد سیکولر پارٹیوں کو مضبوط کرانے کا نتیجہ ہے، بابری کیس میں آج کا یہ فیصلہ مسلمانوں کے آپسی انتشار کے باعث دیا گیا ہے اس لیے موجودہ حالات کے پیش نظر مسلمانوں کو ملک گیر سطح پر ایک متحدہ طاقت کے طور پر ابھرنا ہوگا۔