کورونا وائرس کی ممکنہ تیسری لہر کے مدنظر ممبئی شہر میں ریاستی حکومت کی جانب سے تعمیر کئے جارہے جمبو کووڈ سینٹرز کی تیاریوں کا جائزہ لینے کے لئے آج ممبئی کے مضافاتی علاقے ملاڈ مالونی میں تیار کئے جارہے 2 ہزار بستروں پر مشتمل جمبو کووڈ سینٹر کا ممبئی مضافات کے نگراں وزیر آدتیہ ٹھاکرے و ممبئی شہر کے نگراں وزیر اسلم شیخ نے دورہ کی۔
مذکورہ وزرا نے میونسپل انتظامیہ و محکمہ صحت کے افسران سے ملاقات کی اور جمبو کووڈ سینٹر کو ترجیحی بنیاد پر جلد از جلد عوام کی خدمت کے لئے تیار کئے جانے کی ہدایت دی۔
واضح رہے کہ مذکورہ کووڈ سینٹر 2 ہزار سے زائد بستروں پر مشتمل ہوگا جس میں 70 فیصد بیڈ آکسیجن سے آراستہ ہوں گے جبکہ 200 سے زائد وینٹیلیٹر کے بیڈ بھی دستیاب ہوں گے۔ اس کے علاوہ ان تمام جمبو کووڈ سینٹرز میں بچوں کے لئے علیحدہ پیڈیاٹرك ( شعبہ اطفال ) بھی تیار کیا جائے گا تاکہ کورونا سے متاثر ہونے والے چھوٹے بچوں کو ان کے والدین یا گھر والوں کے ساتھ رکھا جا سکے۔