پاکستانی جیل سے 18 برس بعد رہا ہونے والی خاتون کی روداد

اٹھارہ برس بعد پاکستانی جیل سے بھارت کی ایک ایسی خاتون کو رہائی نصیب ہوئی جن کا کوئی قصور نہیں پھر بھی انہیں برسوں جیل میں رکھا گیا۔

گزشتہ 18 برسوں سے پاکستان کی جیل میں قید مہاراشٹر کے شہر اورنگ باد کی 65 سالہ خاتون حسینہ دلشاد احمد کو حال ہی میں لاہور کی ایک جیل سے رہا کیا گیا وہ گزشتہ روز اورنگ آباد پہنچیں۔

سنہ 2002 میں حسینہ خاتون اپنے رشتہ داروں سے ملنے پاکستان پہنچی تھی جس کے بعد پولیس نے انہیں گرفتار کر لیا تھا۔

پولیس سے ملی تفصیلات کے مطابق 65 سالہ بزرگ خاتون حسینہ دلشاد احمد 2002 میں اپنے رشتہ داروں سے ملنے کے لیے پاکستان کے شہر لاہور گئی تھی لیکن وہ اپنے رشتہ داروں سے مل نہیں سکی اور انہیں پولیس نے گرفتار کر کے جیل میں ڈال دیا تھا اور اب 18 برس گزر جانے کے بعد حسینہ دلشاد احمد کی پاکستان جیل سے رہائی ہوئی۔

کُچھ ماہ قبل 65 سالہ حسینہ دلشاداحمد خاتون کی رہائی ہوئی تھی اور وہ بھارت پہنچ گئی تھیں لیکن کورونا وبا کے سبب لاک ڈاؤن تھا جِس کی وجہ سے وہ امرتسر کے ایک آشرم رہ رہی تھی۔ کورونا وبا کا اثر کم ہونے کے بعد بزرگ خاتون کے رشتے داروں اور پولیس کی مدد سے انہیں 26 جنوری کو امرتسر سے ناندیڑ ہوائی جہاز کے ذریعے لایا گیا اور ناندیڑ سے بذریعہ ٹرین شام میں وہ اورنگ آباد پہنچیں۔

ریلوے اسٹیشن پر پولیس محکمہ کے اعلی افسران اور خاتون کے رشتے داروں نے حسینہ دلشاد احمد کا استقبال کیا۔

حسینہ دلشاد احمد نے ای ٹی وی بھارت کو بتایا کہ بھارت آنے کے بعد انہیں بہت اچھا محسوس ہورہا ہے۔ انہوں نے اورنگ آباد پولیس کا بھی شکریہ ادا کیا۔