اورنگ آباد: دو ہفتوں میں ساٹھ ہزار افراد کو لگایا گیا کورونا کا ٹیکہ

اورنگ آباد میں پچھلے دو ہفتوں میں ساٹھ ہزار افراد کو کورونا کا ٹیکہ لگایا گیا ہے۔ اورنگ آباد میونسپل کارپوریشن کی جانب سے ساٹھ سال سے زائد عمر کے افراد کے لیے مفت میں کورونا ویکسین مہم شروع کی گئی ہے۔

ریاست مہاراشٹر کے شہر اورنگ آباد میں کورونا متاثرین کی تعداد میں آئے دن اضافہ ہورہا ہے، اس حوالے سے انتظامیہ کی طرف سے سخت اقدامات کیے جا رہے ہیں۔ اورنگ آباد شہر میں کورونا وبا پر قابو پانے کے لیے کارپوریشن کی ٹیکہ اندازی مہم بھی شروع کی گئی اور اب اورنگ آباد میں پچھلے دو ہفتوں میں ساٹھ ہزار افراد کو کورونا کا ٹیکہ لگایا گیا۔ کورونا ویکسین لینے والوں میں پچانوے سال کے افراد بھی شامل ہیں۔

اورنگ آباد میونسپل کارپوریشن کی جانب سے ساٹھ سال سے زائد عمر کے افراد کے لیے مفت میں کورونا ویکسین مہم شروع کی گئی ہے، اس مہم کے تحت ہزاروں افراد کو ویکسین لگائی جارہی ہے.

کارپوریشن کے محکمہ ہیلتھ کی انچارج ڈاکٹر نیتا پاڈلکر کا کہنا ہے کہ کورونا ویکسین مہم کو بھرپور عوامی تعاون مل رہا ہے۔ پچھلے دو ہفتوں میں ساٹھ ہزار سے زائد افراد کو کورونا کے ٹیکے لگائے گئے ہیں۔ ہمیں ابھی تک ویکسین کی کوئی شکایت بھی موصول نہیں ہوئی ہے۔ تمام لوگوں کی صحت بالکل اچھی ہے۔ ہم نے 93 سال کی عمر تک کے لوگوں کو بھی ویکسین لگوائی ہے۔

واضح رہے کہ منگل کو اورنگ آباد میں کورونا وائرس کے معاملات کی مجموعی تعداد 60،000 سے تجاوز کرگئی، جسے دیکھتےہوئے اورنگ آباد ڈسٹرکٹ کلکٹر، ڈسٹرکٹ مجسٹریٹ اور پولیس کمشنر نے 4 اپریل تک لوگوں کے جمع ہونے پر پابندی عائد کرنے کا حکم جاری کیا ہے۔