زہریلا کھانا کھانے سے مدرسے کی 60 طالبات بیمار

ریاست مہاراشٹر کے ضلع اورنگ آباد کے مدرسہ رابعہ بصری للبنات کی 60 سے زائد طالبات کی طبیعت دعوت میں کھانا کھانے کے بعد خراب ہوگئی۔ ایک طالبہ کی حالت ابتر ہے۔

مدرسے کی تمام طالبات کو ایک دعوت میں لے جایا گیا تھا جہاں کھانا کھانے کے بعد واپسی کے دوران ان کی حالت بگڑنے لگی۔

حالت اتنی خراب ہوگئی کہ ان کا دم گھٹنے لگا اور متلی و قئے آنا شروع ہوگئی جس کے بعد انھیں گھاٹی دواخانے میں داخل کیا گیا۔

فی الحال ڈاکٹروں کا کہنا ہے کہ ابھی ایک طالبہ کی حالت نازک ہے اور بقیہ کی حالت خطرے سے باہر ہے۔

واضح رہے کہ مدرسہ رابعہ بصری للبنات ضلع اورنگ آباد کے پڑے گاؤں میں واقع ہے۔

معاملے کی مزید تفتیش کی جارہی ہے۔