اورنگ آباد کی ایک کمپنی میں آتشزدگی، چھ افراد ہلاک

Massive Fire Broke Out in Hand Glove Company in Maharshtra ریاست مہاراشٹر کے شہر اورنگ آباد کے مضافات میں ہاتھ کے دستانے بنانے والی ایک کمپنی میں آتشزدگی کا واقعہ پیش آیا جس میں اب تک چھ افراد ہلاک ہوئے ہیں۔

اورنگ آباد: شہر اورنگ آباد کے مضافات میں واقع والوج ایم آئی ڈی سی علاقے میں اتوار کی اولین ساعتوں میں ہاتھ کے دستانے بنانے والی ایک کمپنی میں لگنے والی زبردست آگ میں کم از کم چھ افراد ہلاک ہو گئے ہیں۔محکمہ فائر اینڈ ایمرجنسی کے حکام کے مطابق والوج ایم آئی ڈی سی علاقے میں واقع فیکٹری میں صبح 2:15 بجے کے قریب آگ بھڑک اٹھی۔

ایک فائر آفیسر موہن منگسے نے اے این آئی سے بات کرتے ہوئے کہا کہ "ہمیں 2 بج کر 15 منٹ پر کال موصول ہوئی جب ہم جائے حادثہ پر پہنچے تو پوری فیکٹری میں آگ لگی ہوئی تھی۔ مقامی لوگوں نے ہمیں بتایا کہ چھ افراد اندر پھنسے ہوئے ہیں۔ ہمارے اہلکار اندر داخل ہوئے اور چھ لوگوں کی لاشیں نکال لی گئی ہیں"۔ انہوں نے مزید کہا کہ "آگ بجھانے کا کام فی الحال جاری ہے۔"

قبل ازیں مقامی لوگوں نے دعویٰ کیا تھا کہ عمارت کے اندر کم از کم پانچ کارکن پھنسے ہوئے ہیں۔ فائر ڈپارٹمنٹ کے اہلکاروں نے بعد میں آگ لگنے کے واقعے میں چھ افراد کی ہلاکت کی تصدیق کی ہے۔ کارکنوں کا کہنا تھا کہ کمپنی بند تھی، اور جب آگ لگی تو عمارت کے اندر 10-15 کارکن سو رہے تھے۔

ایک کارکن نے بتایا کہ "کچھ افراد جائے حادثے سے بچ نکلنے میں کامیاب ہو گئے، لیکن کم از کم پانچ افراد اندر پھنس گئے"۔ دریں اثنا، آگ بجھانے کی کارروائیاں جاری ہیں، اور آگ لگنے کی اصل وجہ کا ابھی تک پتہ نہیں چل سکا ہے۔