مہاراشٹر: کیمیکل فیکٹری میں دھماکہ، 2 ہلاک، متعدد زخمی

مہاراشٹر کے ضلع رائے گڑھ میں آج صبح ایک کیمیکل فیکٹری میں دھماکہ ہوا، جس میں خاتون سمیت 2 افراد ہلاک جب کہ 6 افراد شدید زخمی ہوئے ہیں۔

ممبئی سے 70 کلو میٹر کے فاصلے پر واقع کھوپولی کے سج گاؤں انڈسٹریل علاقہ میں ایک فیکٹری میں گزشتہ نیم شب تقریبا ڈھائی بجے اچانک ایک دھماکہ ہوا، جس کے بعد پورے احاطے میں آگ لگ گئی۔

کھوپولی پولیس اسٹیشن کے ایک اہلکار نے بتایا کہ اس حادثے میں ایک خاتون سمیت دو افراد ہلاک اور چھ زخمی ہوگئے۔

انہوں نے بتایا کہ فائر بریگیڈ اور پولیس اہلکار موقع پر پہنچ گئے اور آگ کو قابو میں کرنے کی کوشش کے ساتھ ہی ریسکیو آپریشن جاری ہے۔

افسر نے بتایا کہ زخمیوں کو کھوپولی کے ایک نجی ہسپتال میں داخل کیا گیا ہے۔

انہوں نے مزید بتایا کہ صبح سویرے تک آگ بجھانے کی کوشش جاری تھی۔