بھوپال:آج یعنی 17 نومبر کا دن مدھیہ پردیش کے لیے بہت خاص ہے، کیونکہ آج ریاست کے 5 کروڑ سے زیادہ ووٹر اپنے ووٹ کا استعمال کریں گے اور آنے والے 5 سالوں کے لیے اپنی حکومت کا انتخاب کریں گے۔ ووٹنگ صبح 7 بجے سے شروع ہوگئی ہے جو شام 6 بجے تک جاری رہے گی۔ آج ایم پی کی 230 اسمبلی نشستوں کے 2533 امیدواروں کی قسمت کا فیصلہ ہوگا۔ آپ کو بتاتے چلیں کہ ریاست بھر میں 5 کروڑ 60 لاکھ ووٹر 64 ہزار 523 پولنگ سٹیشنوں پر جائیں گے اور 2533 امیدواروں کے لیے اپنا ووٹ ڈالیں گے۔ اس کے ساتھ ہی ایم پی میں 17 ہزار حساس پولنگ بوتھ بنائے گئے ہیں، الیکشن کمیشن کے مطابق ان پولنگ بوتھس کی ویب کاسٹنگ کے ذریعے نگرانی کی جائے گی۔
مدھیہ پردیش میں شام 5 بجے تک 70.99 فیصد ووٹنگ ہوئی۔
مدھیہ پردیش میں سہ پہر تین بجے تک 60.38 فیصد ووٹنگ ہوئی۔
چھتیس گڑھ میں دوسرے مرحلے کی ووٹنگ: سہ پہر 3 بجے تک 55.31 فیصد ووٹنگ ہوئی۔
- ہائی پروفائل سیٹ پر فائرنگ:
ایم پی کی سب سے ہائی پروفائل سیٹ اور مرکزی وزیر نریندر سنگھ تومر کے اسمبلی حلقہ میں دو برادریوں کے درمیان فائرنگ کی خبر ہے۔ تاہم یہ واضح نہیں ہے کہ گولی کیوں چلائی گئی۔ انتظامیہ اور پولیس کی ٹیمیں موقع پر موجود ہیں۔ انتخابات کے لیے آج ووٹنگ جاری ہے، اسی دوران میرگھن گاؤں میں فائرنگ سے ماحول گرم ہوگیا۔ فائرنگ کے بعد علاقے میں خوف وہراس ہے اور کسی جانی و مالی نقصان کی خبر موصول نہیں ہوئی ہے۔ ہوائی فائرنگ سے علاقے میں کہرام مچ گیا اور لوگ موقع سے بھاگنے لگے۔
- مدھیہ پردیش میں ووٹنگ کا عمل جاری ہے:
بی جے پی اور کانگریس کے بزرگ لیڈر اپنے ووٹ کاسٹ کرنے کے لیے اپنے حلقے کے ووٹنگ سینٹر پہنچ رہے ہیں۔ ووٹنگ سے پہلے لیڈروں نے پوجا پاٹھ کا اہتمام کیا۔ وزیر اعلیٰ شیوراج سنگھ چوہان، سابق وزیر اعلیٰ کمل ناتھ، کانگریس لیڈر جیتو پٹواری، وزیر پرہلاد پٹیل، کیلاش وجے ورگیہ نے پوجا کی اور جیت کے لیے دعا کی اور پھر ووٹ دیا۔
- لیڈروں کو نظر بند کیا گیا:
بھنڈ میں اسمبلی انتخابات میں حصہ لینے والے امیدوار کانگریس کے چودھری راکیش سنگھ چترویدی، بی جے پی کے نریندر سنگھ کشواہا اور بی ایس پی امیدوار بھنڈ کے ایم ایل اے سنجیو کشواہا کو گھر میں نظر بند کر دیا گیا۔ انتظامیہ نے تینوں امیدواروں کو سرکٹ ہاؤس میں بٹھا دیا۔ ایٹر ایم ایل اے اور وزیر اروند بھدوریا، ان کے بھائی دیویندر بھدوریا اور کانگریس امیدوار ہیمنت کو بھی سرکٹ ہاؤس میں نگرانی میں رکھا گیا تھا۔
