ستنا: چوروں نے اے ٹی ایم کے بعد پوسٹ آفس کو نشانہ بنایا

ضلع ستنا کے سٹی کوتوالی پولیس اسٹیشن سے چند قدم کے فاصلے پر واقع ہیڈ پوسٹ آفس میں چوروں نے فلمی انداز میں گیس کٹر سے دروازے کو کاٹ کر چوری کی واردات کو انجام دیا۔

ریاست مدھیہ پردیش کے ضلع ستنا میں پولیس سے بے خوف چوروں نے گزشتہ دنوں میں ضلع کے سبھا پور تھانہ علاقے میں واقع ایکسس بینک کے اے ٹی ایم میں دھماکہ کر کے لوٹ کی واردات کو انجام دیا۔

وہیں دوسری طرف چوروں نے اے ٹی ایم کے بعد ستنا کے سٹی کوتوالی پولیس اسٹیشن سے چند قدم کے فاصلے پر واقع ہیڈ پوسٹ آفس میں فلمی انداز میں گیس کٹر سے دروازے کو کاٹ کر چوری کی واردات کو انجام دیا۔ چوری کی پوری واردات سی سی ٹی وی کیمرے میں قید ہو گئی۔

معلومات کے مطابق چوروں نے گیس کٹر کی مدد سے ایک پوسٹ آفس ونڈو سمیت 7 تالے توڑے، اندر موجود سی سی ٹی وی کیمرے کو بھی موڑ دیا۔

چوروں نے لوہے کی پرانی صندوق کو بھی کاٹنے کی کوشش کی، لیکن وہ اس میں کامیاب نہیں ہوسکا۔

صبح جب پوسٹ ماسٹر آفس پہنچا تو وہاں کا نظارہ دیکھ کر اس کے ہوش اڑ گئے۔

اس واقعے کی اطلاع سٹی کوتوالی پولیس کو دی گئی، پولیس نے جائے وقوع پر پہنچ کر تفتیش شروع کردی۔

وہیں ڈاک خانے کا عملہ صندوق کے باہر بکھرے نوٹ کو دیکھ کر رقم غائب ہونے کی توقع تو کر رہا ہے، لیکن کتنی رقم چوری ہوئی ہے اس پر نہ تو پوسٹ ماسٹر کچھ بول رہے ہیں اور نہ ہی پولیس کچھ بتانے کی پوزیشن میں ہے۔

ستنا ایس پی دھرم ویر سنگھ کے مطابق ڈاک خانے میں چوری نہیں ہوئی ہے، لیکن کچھ نوٹ بھی دفتر کے اندر بکھرے ہوئے ملے تھے۔