Tadabeer Mashaikh Workshop In Bhopal: بھوپال میں چھ روزہ تدابیر مشائخ ورکشاپ کا انعقاد

بھوپال کے حکیم سید ضیاء الحسن گورنمنٹ یونانی کالج کے زیر اہتمام بھوپال میں تدابیر مشائخ کے عنوان سے 6 روزہ یونانی ورکشاپ کا انعقاد کیا گیا۔ اس 6 روزہ یونانی قومی ورکشاپ میں ماہرین طب نے بزرگوں میں بڑھتی بیماری، علاج اور تدابیر پر اپنے تجربات کو نئی نسل کے سامنے پیش کیا-

بھوپال :دارالحکومت بھوپال کے یونانی کالج حکیم اجمل خان میں منعقد چھ روزہ ورکشاپ کے پہلے روز افتتاحی سیشن کے علاوہ دو ٹیکنکل سیشن کا انعقاد عمل میں آیا جس میں ماہرین طب نے تدابیر مشائخ کے حوالے سے نئی تحقیق کو پیش کرکے اسے موثر انداز میں عمل میں لانے کے لیے اپنے موقف کا اظہار کیا۔ کالج کی پرنسپل پروفیسر محمودہ بیگم نے پروگرام کے اغراض و مقاصد پر تفصیلی روشنی ڈالی پروفیسر محمودہ بیگم نے بتایا کہ پروگرام کا مقصد تدابیر مشائخ سے طلباء کو روشناس کرایا جائے۔ ہمیں امید ہے کہ 6 روزہ ورکشاپ میں ماہرین طب کے ذریعہ جو مشاہدات پیش کیے جائیں گے اس سے صحت کے میدان میں کام کرنے والے استفادہ کریں گے۔

سی ایم ای کے تحت تدابیر مشائخ کے عنوان سے منعقدہ روزہ ورکشاپ میں ممتاز ماہر ادیب پروفیسر افتخار احمد نے کہا کہ طب یونانی جدید ریسرچ کے مؤثر نتائج سامنے آرہے ہیں اور ملک و بیرونی ملک میں طب یونانی کی جانب تیزی سے عوام کا رجحان بڑھ رہا ہے۔ یہاں 6 روزہ ورکشاپ میں نہ صرف ماہرین، کیس اسٹڈی کے ذریعے بزرگوں کو ہونے والی بیماری اور اس کے علاج کے بارے میں بتائیں گے بلکہ بزرگوں کو احتیاطی تبدایر کے ذریعہ بیماریوں سے کیسے بچایا جا سکتا ہے اور ان کی عمر میں اضافہ کیا جاسکتا ہے اس پر بھی غور کیا جائے گا۔

سی ایم ایچ او بھوپال ڈاکٹر پربھاکر تیواری نے بزرگوں کو ہونے والی بیماری کے تعلق سے محکمہ آیوش کی نگرانی میں سید ضیاء الحسن یونانی کالج میں منعقدہ 6 روزہ ورکشاپ کو وقت کی ضرورت سے تعبیر کیا۔ پروگرام میں مہمانان کرام نے کہا کہ میدان میں کام کرنے والوں کے لیے میل کا پتھر ثابت ہوگا - انہوں نے کہا کہ طب یونانی کی اہمیت و افادیت میں جس طرح سے اضافہ ہورہا ہے اس سے طب یونانی کے میدان میں کام کرنے والوں کے لیے چیلنج بھی بڑھ گئے ہیں-