اندور: شہر قاضی نے لوگوں سے ٹیکہ کاری کی اپیل کی

ریاست مدھیہ پردیش کے صنعتی شہر اندور میں اپر کلکٹر اور شہر قاضی نے مسلم علاقوں کا دورہ کیا اور لوگوں سے کورونا سے تحفظ کے لیے جلد از جلد ٹیکہ لگوانے کی اپیل کی۔

شہر اندور میں کورونا وائرس کے مریضوں میں دن بہ دن اضافہ ہو رہا ہے، گزشتہ 24 گھنٹوں میں یہاں کورونا کے 898 نئے کیسز سامنے آئے ہیں۔ اس سے تحفظ کے لیے حکومت نے ریاست میں کورونا ٹیکہ کاری مہم کا انعقاد کیا ہے۔

شہر قاضی ڈاکٹر سید عشرت علی اور اپر کلیٹر راجیش راٹھور نے مسلم رہنماؤں کے ساتھ علاقوں کا دورہ کیا اور لوگوں سے اپیل کی ہے کہ وہ جلد از جلد کورونا کا ٹیکہ لگوا لیں۔

اس موقع پر شہر قاضی نے کہا کہ عالمی سطح پر کرونا سے لوگ متاثر ہو رہے ہیں اور اس سے تحفظ کے لئے جتنی جلدی ہو کورونا کا ٹیکہ کا لگوا لینا چاہیے۔

اپر کلکٹر نے کہا کہ مسلم علاقوں میں ٹیکہ کاری کی تعداد میں اضافہ ہونا چاہیے تاہم اس سلسلے میں اضافہ نہیں ہو رہا ہے، اس لیے ہم شہر قاضی کو اپنے ساتھ لے کر لوگوں کو بیدار کر رہے ہیں اور لوگوں سے کورونا ویکسینیشن میں زیادہ سے زیادہ حصہ لینے کی اپیل کر رہے ہیں۔