بھوپال: مولانا برکت اللہ بھوپالی ایجوکیشن سوسائٹی کے زیر اہتمام قاضی وجدی الحسینی پر دو روزہ قومی سیمینار کا انعقاد کیا گیا۔ سیمینار کے افتتاحی اجلاس کی صدارت موجودہ شہر قاضی مولانا سید مشتاق علی ندوی نے فرمائی جب کہ قومی کونسل برائے فروغ اردو زبان نئی دہلی کے ڈائریکٹر ڈاکٹر شیخ عقیل احمد مہمانِ خصوصی کی حیثیت سے شریک ہوئے۔ اس کے علاوہ پدم شری حکیم سید ظل الرحمن، مفتی شہر مولانا ابوالکلام قاسمی، ڈاکٹر خالد محمود، مولانا عمیرالصدیق ندوی اور دیگر مہمنان موجود رہے۔ Maulana Barkatullah Bhopali Educational Society
اس دوران برکت اللہ سوسائٹی کے صدر حاجی محمد ہارون نے اپنی استقبالیہ تقریر میں کہا کہ قاضی وجدی الحسینی صاحب ہر بھوپال والے کے دل میں بسے ہیں۔ اِس سیمینار کا مقصد یہ ہے کہ نئی نسل بھی قاضی صاحب سے واقف ہوسکے۔ حاجی ہارون نے اعلان کیا کہ قاضی وجدی الحسینی صاحب کے نام سے ہر سال ایک پروگرام منعقد کیا جائے گا اور اُن کے نام پر ہر سال دو ایوارڈ بھی دیئے جائیں گے نیز ہماری کوشش ہوگی کہ قاضی صاحب کی وہ کتابیں جو منظر عام نہیں آ سکی ہیں ان کتابوں کو بھی شائع کیا جائے گا۔
اُنہوں نے بتایا کہ علامہ سید عابد علی وجدی الحسینی کا شمار اہم شخصیات میں ہوتا ہے۔ وہ ہمہ جہت شخصیت کے مالک ہونے کے سبب اپنی ذات میں ایک انجمن تھے۔ اُن کے نانا حکیم حافظ عبدالحفیظ خاں اُنھیں اپنی طرح طبیب بنانا چاہتے تھے لیکن وجدیؔ صاحب نے عالمِ دین بننا پسند کیا اور درس و تدریس کے پیشے سے وابستگی کو ترجیح دی۔ ان کی تمام خوبیوں کے ساتھ ان کی خوبی یہ بھی تھی کہ وہ قومی یکجہتی کے علمبردار تھے، ہر مذہب کے ماننے والوں سے ان کے تعلقات تھے۔
جلسہ کی صدارت فرماتے ہوئے شہر قاضی مولانا سید مشتاق علی ندوی نے کہا کہ جو لوگ اداروں سے وابستہ ہوتے ہیں وہ اداروں کے نام سے فائدہ اُٹھاتے ہیں لیکن علامہ سید عابد علی وجدی الحسینی صاحب ایسی شخصیت تھی کہ اُنھوں نے اداروں کو اپنی ذات سے مستفید فرمایا۔