Love Jihad: لو جہاد اور تین طلاق معاملہ پر پولیس پر لاپرواہی برتنے کا الزام

ریاست مدھیہ پردیش کے دارالحکومت بھوپال سے بھارتیہ جنتا پارٹی کی رکن پارلیمان پرگیہ سنگھ ٹھاکر نے ریاست کے محکمہ پولیس پر لو جہاد اور تین طلاق معاملوں میں صحیح طریقے سے کارروائی نہ کرنے کا الزام عائد کیا ہے۔

مدھیہ پردیش میں لو جہاد پر قانون بنایا گیا ہے لیکن بھوپال کی رکن پارلیمان پرگیہ سنگھ ٹھاکر نے لو جہاد اور تین طلاق پر بیان دیتے ہوئے کہا کہ 'میں نے دیکھا ہے کہ ریاستی محکمہ پولیس لو جہاد کے معاملوں میں مناسب طریقے سے کارروائی نہیں کررہی ہے۔ جن لوگوں کے ساتھ واقعات پیش آ رہے ہیں ان کے اہل خانہ پریشان ہیں اور پولیس ان کے لیے کچھ نہیں کررہی ہے۔

پرگیہ سنگھ ٹھاکر نے کہا کہ تین طلاق پر قانون بنایا جاچکا ہے لیکن پولیس اس پر بھی سختی سے قدم نہیں اٹھارہی ہے، اس لیے لوگوں کی ہمت بڑھ رہی ہے۔

انہوں نے کہا کہ جس طرح سے جرائم میں اضافہ ہورہا ہے، اس پر اعلیٰ افسران اور پولیس کی بالکل بھی توجہ نہیں ہے اس لیے میں اعلیٰ افسران اور محکمہ پولیس کے ساتھ میٹنگ کرنے والی ہوں اس دوران جن معاملوں پر تبادلہ خیال ہوگا وہ حساس معاملات ہیں۔