بھوپال میں شہریت ترمیمی قانون کے خلاف پرامن ریلی

بھوپال میں جمیعت علماء ہند کی جانب سے شہریت ترمیمی قانون کے خلاف پرامن ریلی کا انعقاد کیا گیا، جس میں سبھی مذاہب کے لوگوں نے شرکت کی-

ریاست مدھیہ پردیش کے دارالحکومت بھوپال میں مسجد عثمان کلیان نگر سے شہریت ترمیمی قانون کے خلاف جمعیۃ علما ہند ضلع بھوپال کے صدر حافظ محمد اسماعیل بیگ اور جمعیت علمائے ہند مدھیہ پردیش کے صدر حاجی محمد ہارون کی قیادت میں ایک عظیم الشان دستور بچاؤ ریلی کا انعقاد کیا گیا۔

ریلی میں سبھی مذاہب کے لوگوں نے کثیر تعداد میں شریک ہو کر آپسی بھائی چارہ کا ثبوت دیا اور ریلی کو کامیاب اور پرامن بنانے میں بھر پور تعاون دیا- ریلی میں آئے مذہبی رہنماؤں نے شہریت ترمیمی قانون اور حکومت ہند کی ناانصافی اور جانبدارانہ رویے کی پرزور مخالفت کی-بتا دیں کہ جمعیت علماء ہند شروع سے ہی شہریت ترمیمی قانون کی مخالفت کر رہی ہے، ساتھ ہی جمعیت اس قانون کے خلاف دستخطی مہم بھی چلا رہی ہے۔ دستخطی مہم میں ایک لاکھ دستخط ہونے پر صدر جمہوریہ کو دستخط کے ساتھ میمورنڈم دیا جائے گا-