مدھیہ پردیش میں آج وزیراعلی کی حلف برداری تقریب

ریاست مدھیہ پردیش میں آج نئے نامزد وزیراعلی موہن یادو کی حلف برداری تقریب منعقد ہوگی جس میں وزیر اعظم سمیت دیگر رہنما شرکت کریں گے۔ Swearing-in ceremony of MP CM Mohan Yadav today

بھوپال: مدھیہ پردیش کے نئے نامزد وزیر اعلیٰ موہن یادو کی حلف برداری کی تقریب آج ریاستی دارالحکومت بھوپال کے لال پریڈ گراؤنڈ کے موتی لال نہرو اسٹیڈیم میں منعقد ہونے والی ہے۔ اس سے قبل بھارتیہ جنتا پارٹی (بی جے پی) کے ریاستی صدر وی ڈی شرما نے منگل کو دعویٰ کیا کہ یہ تاریخی حلف برداری تقریب ہوگی۔ اس تقریب میں وزیر اعظم نریندر مودی، مرکزی وزیر امیت شاہ، بی جے پی کے قومی صدر جے پی نڈا اور دیگر موجود ہوں گے۔

وی ڈی شرما نے کہا کہ "ہمارے نئے نامزد وزیر اعلیٰ ڈاکٹر موہن یادو اور ان کی کابینہ بدھ کو موتی لال نہرو اسٹیڈیم میں منعقدہ تقریب میں حلف لیں گے۔ اس تقریب میں وزیر اعظم نریندر مودی، مرکزی وزیر امیت شاہ اور نیشنل پارٹی کے صدر جے پی نڈا سمیت پارٹی کے دیگر عہدیدار، مرکزی وزراء اور دیگر ریاستوں کے وزرائے اعلیٰ شرکت کریں گے۔اس کے علاوہ بڑی تعداد میں پارٹی کارکنان بھی پروگرام میں شرکت کریں گے۔ پروگرام میں شرکت کرنے والے سبھی کو میں خوش آمدید کہتا ہوں، اور یہ حلف برداری تقریب تاریخی ہوگی"۔ قبل ازیں شرما نے پارٹی کے دیگر عہدیداروں کے ساتھ پروگرام کے مقام پر جاری تیاریوں کا جائزہ لیا۔

واضح رہے کہ موہن یادو پہلی بار 2013 میں اجین دکشن اسمبلی حلقہ سے رکن اسمبلی منتخب ہوئے تھے۔ 2018 کے مدھیہ پردیش قانون ساز اسمبلی کے انتخابات میں وہ ایک بار پھر منتخب ہوئے اور اجین دکشن حلقہ سے رکن اسمبلی منتخب ہوئے تھے۔ اس سے قبل 2 جولائی 2020 کو انہوں نے شیوراج سنگھ چوہان کی سربراہی میں مدھیہ پردیش حکومت میں کابینہ کے وزیر کے طور پر حلف لیا تھا۔

بی جے پی لیڈر نے پارٹی کی مرکزی قیادت کی ستائش کرتے ہوئے کہا کہ ان کی قیادت اور حکمت عملی کی وجہ سے پارٹی کو ریاست میں زبردست کامیابی حاصل ہوئی ہے۔ ریاست مدھیہ پردیش میں 17 نومبر کو ایک ہی مرحلے میں 230 اسمبلی نشستوں کے لیے ووٹنگ ہوئی تھی جبکہ ووٹوں کی گنتی 3 دسمبر کو ہوئی تھی جس میں بی جے پی کو زبردست کامیابی حاصل ہوئی ہے۔