موہن یادو نے مدھیہ پردیش کے وزیراعلی کی حیثیت سے حلف لیا

Mohan Yadav takes oath as Madhya Pradesh Chief Minister ریاست مدھیہ پردیش کے دار الحکومت بھوپال کے لال پریڈ گراؤنڈ میں منعقدہ تقریب میں موہن یادو نے مدھیہ پردیش کے وزیر اعلی کے طور پر حلف لیا ہے۔ گورنر منگو بھائی سی پٹیل نے انہیں رازداری کا حلف دلایا۔

بھوپال: مدھیہ پردیش کے نامزد وزیر اعلیٰ موہن یادو نے وزیر اعلیٰ کے طور پر حلف لیا ہے اور انہیں بھوپال کے لال پریڈ گراؤنڈ میں گورنر منگو بھائی سی پٹیل نے رازداری کا حلف دلایا ہے۔

اس تقریب میں وزیر اعظم نریندر مودی، مرکزی وزیر داخلہ امت شاہ اور بی جے پی کی حکومت والی ریاستوں کے وزرائے اعلیٰ سمیت دیگر رہنماوں نے شرکت کی۔ اس دوران دو نائب وزیر اعلیٰ راجندر شکلا اور جگدیش دیوڈا نے حلف لیا۔

حلف برداری کی تقریب میں پہنچنے سے پہلے موہن یادو نے بھوپال میں ایک مندر کا دورہ کیا اور ریاستی بی جے پی دفتر کا دورہ کیا، جہاں انہوں نے جن سنگھ کے بانی ارکان میں سے ایک پنڈت دین دیال اپادھیائے اور زعفرانی پارٹی کے بانی شیاما پرساد مکھرجی کو خراج عقیدت پیش کیا۔ حلف برداری تقریب کے لیے بھرپور انتظامات کیے گئے تھے۔

حلف برداری تقریب میں اتر پردیش کے وزیر اعلیٰ یوگی آدتیہ ناتھ، مرکزی وزیر جیوترادتیہ سندھیا، بی جے پی کے اتحادی اور مہاراشٹر کے وزیر اعلیٰ ایکناتھ شندے بھی موجود تھے۔ اس تقریب میں بھارتیہ جنتا پارٹی کے کارکنان کی ایک بڑی تعداد خاص طور پر یادو کے آبائی شہر اجین سے موجود تھی۔

واضح رہے کہ بی جے پی نے موہن یادو کو اپنی پسند کے طور پر وزارت اعلی کے عہدہ کے لئے منتخب کیا۔ حالانکہ ریاست میں بی جے پی کو بھاری اکثریت حاصل ہونے کے بعد قیاس لگایا جارہا تھا کہ شیوراج سنگھ چوہان ہی وزیراعلی ہوں گے۔ انتخابات میں بی جے پی کی کامیابی کی وجہ شیوراج سنگھ چوہان کی لاڈلی بہنا اسکیم کو بھی اہم مانا جارہا تھا۔