خاتون کو زدوکوب کرنے کا ویڈیو وائرل

مدھیہ پردیش کے ضلع دھار کے تھانہ نالچا کے تحت واقع گاؤں بھیل تلواڑہ میں ایک خاتون کو کچھ لوگ لاٹھیوں اور ڈنڈوں سے پیٹ رہے ہیں، جس کا ویڈیو سوشل میڈیا پر وائرل ہو رہا ہے۔

ریاست مدھیہ پردیش کے ضلع دھار کا ایک ایسا ویڈیو سامنے آیا ہے جس میں ایک عورت کو لاٹھیوں سے پیٹا جا رہا ہے۔

دراصل، یہ معاملہ دو ماہ پرانا ہے اور اس ویڈیو کے سامنے آنے کے بعد یہ انکشاف ہوا ہے۔

گاؤں بھیل تلواڑہ کی ایک خاتون کی شادی پاس کے گاؤں نانکی پورہ کے ساکن نارائن سے ہوئی تھی۔ شادی کے فورا بعد ہی نارائن اپنی بیوی کے ساتھ کمانے کے لیے گجرات چلا گیا لیکن اس کی بیوی گجرات میں مزدوری نہیں کرنا چاہتی تھی اور بار بار اپنے والدین کے پاس گاؤں بھیل تلواڑہ واپس چلی آتی تھی۔ اس بات سے ناراض ہو کر اس کے والد پرتاپ، والدہ جتن بائی، کاکا بھوتیا اور اس گاؤں کے پٹیل کنی رام نے اس کو لاٹھیوں سے پیٹا۔

اس پورے معاملے کا ویڈیو منظر عام پر آنے کے بعد پولیس حرکت میں آئی اور تین ملزمین پرتاپ، جتن بائی اور بھوتیا کو گرفتار کر لیا گیا ہے۔ پولیس اب اس معاملے میں مزید کارروائی میں مصروف ہے۔