بھوپال:ریاست مدھیہ پردیش کے بھوپال کے ٹرائیل میوزیم آڈیٹوریم میں ریاستی اردو اکاڈمی سنسکرتی پریشن محکمۂ ثقافت کے زیر اہتمام "وحدت میں تیرے حرف دوئی کا نہ آ سکے" اردو ادب میں وحدت الوجود پر مبنی محفل صوفیانہ، صوفی سمینار' صوفیانہ مشاعرہ اور فکری اجلاس کا انعقاد کیا گیا۔ پروگرام کی شروعات میں اردو اکاڈمی کی ڈائریکٹر ڈاکٹر نصرت مہدی نے تمام مہمانوں کا استقبال کرنے کے بعد پروگرام کے اغراض و مقاصد پر روشنی ڈالتے ہوئے کہا کہ یہ پروگرام اردو ادب میں وحدت الوجود پر مبنی ہے۔ جیسا کہ آپ سب ہی جانتے ہیں کہ مدھیہ پردیش کا جو محکمۂ ثقافت ہے۔ وہ اپنی مختلف اکاڈمیوں کے ساتھ ملک کا سب سے زیادہ فعال اور متحرک محکمہ ہیں۔ یہ محکمہ اپنی مثبت سوچ کے ساتھ آگے بڑھ رہا ہے۔
انہوں نے کہا کہ ادارے کے ذریعہ جو پروگرام منعقد ہوتے ہیں۔ ان کے ذریعہ محکمہ کا مقصد یہ ہے کہ سماجی ہم آہنگی کا پیغام عام ہو اور محبت کا پیغام عام ہو۔ آج کا پروگرام بھی اسی پیغام کو لے کر تصوف پر مبنی ہے۔ تصوف جو ہندوستان کی سرزمین پر اس لیے پنپا، اس لیے بہت مقبولیت اس نے حاصل کی کیوں کہ یہاں کا پس منظر روحانی تھا۔ ان کا کہنا ہے کہ آپ سب بھی اس بات سے متفق ہوں گے کہ روحانیت ہندوستان کا خاصہ ہے۔ اس لیے صوفیاء کرام کی خدمات کو مدنظر رکھتے ہوئے آج کا پروگرام منعقد کیا گیا ہے۔