اندور میں چوری کا معمہ حل

ریاست مدھیہ پردیش کے صنعتی شہر اندور میں پولیس نے ایک ایسے شاطر چور گروہ کا انکشاف کیا ہے جو گاڑیوں میں گھوم کر چوری کرتا تھا۔

لسوڑیاں تھانہ علاقے میں گذشتہ کئی روز سے پولیس کو چوری کی شکایت مل رہی تھی جس کے بعد پولیس نے کارروائی کرتے ہوئے ایک ایسے گروہ کا انکشاف کیا جو گاڑیوں میں تفریح کر کے مکانوں کی ریکی کرتا تھا اور پھر چوری کی واردات کو انجام دے دیتا تھا۔

پولیس کی نظر سے بچنے کے لیے چور باقاعدہ اپنی گاڑی میں ایک خاتون کو بھی رکھتے تھے تاکہ جانچ پڑتال کے دوران وہ پولیس کو چکمہ دے سکیں۔

پولیس نے ان کے پاس سے 6 لاکھ روپے کا مال اور کاریں برآمد کی ہیں۔

پولیس نے اس معاملے میں دو مرد اور ایک خاتون کو گرفتار کیا ہے جبکہ ان کے دو ساتھی اب بھی فرار ہیں۔

ایڈیشنل ایس پی یوسف قریشی نے بتایا کہ 'ملزمین کو گرفتار کر کے گاڑیاں اور مسروقہ سامان ضبط کیا گیا ہے اور ان سے مزید پوچھ گچھ جاری ہے۔'