Bus fell in Narmada River: نرمدا ندی میں بس گری، 13 مسافر ہلاک

ریاست مدھیہ پردیش کے ضلع دھار میں ایک بس نرمدا ندی میں گر گئی۔ بس میں 13 مسافر سوار تھے اور حادثے میں سبھی کی موت ہوگئی۔ passenger bus fell in narmada river

دھار: مدھیہ پردیش کے دھار ضلع کے کھلگھاٹ میں ایک بڑا حادثہ رونما ہوا، بس میں سوار سبھی 13 مسافروں کی موت ہوگئی۔ یہ بس اندور سے مہاراشٹر جا رہی تھی۔ بتایا جا رہا کہ توازن بگڑنے کی وجہ سے بس 25 فٹ نیچے ندی میں جا گری۔

تفصیلات کے مطابق اندور سے پونے جا رہی بس صبح 10.45 بجے دھامنود میں کھلگھاٹ کے قریب نرمدا ندی میں گر گئی جس کے سبب بس میں سوار سبھی مسافر موت کے منہ میں چلے گئے۔ بس پُل کی ریلنگ توڑکر نرمدا میں جا گری تھی۔ وہیں یہ بات بھی سامنے آئی کہ یہ پُل کافی پُرانا تھا۔ بس مہاراشٹر اسٹیٹ ٹرانسپورٹ کی تھی۔

اس حادثے کے بعد مدھیہ پردیش کے وزیر اعلی شیوراج سنگھ چوہان نے ٹویٹ کرتے ہوئے لکھا کہ 'کھرگون کے اس دل دہلا دینے والے حادثے نے ہمارے بہت سے پیاروں کو ہم سے چھین لیا۔ دکھ کی اس گھڑی میں، میں خاندانوں کے ساتھ ہوں۔'

سابق وزیراعلی کمل ناتھ نے ٹویٹ کرتے ہوئے لکھا کہ 'دھار ضلع کے کھلگھاٹ میں مسافروں سے بھری بس نرمدا ندی میں گرنے کی افسوسناک اطلاع موصول ہوئی ہے۔' میں حکومت اور انتظامیہ سے اپیل کرتا ہوں کہ جنگی پیمانے پر راحت رسانی کا کام کرکے متاثرین کو راحت پہنچائیں۔