مدھیہ پردیش میں کورونا پابندیاں ختم: شیو راج

ریاست مدھیہ پردیش میں رات کا کرفیو ختم کرنے کے ساتھ ساتھ دیگر پابندیاں بھی ہٹا دی گئیں- اب تمام سماجی، سیاسی، تفریحی، ثقافتی اور مذہبی تقریبات پوری صلاحیت کے ساتھ منعقد کی جائیں گی۔

ریاست مدھیہ پردیش کے وزیر اعلی شیوراج سنگھ چوہان نے بتایا کہ ریاست میں کورونا تقریباً کنٹرول میں ہے۔ اس لیے ریاستی حکومت کی جانب سے ایسی پابندیوں کو ہٹانے کا فیصلہ کیا جا رہا ہے جو اب تک نافذ تھی۔ یہ پابندیاں کورونا وبا کے دوران لگائی گئی تھی۔ شیوراج سنگھ چوہان نے سیکرٹریٹ میں ریاست میں کورونا کی صورتحال کا جائزہ لیتے ہوئے یہ ہدایات دیں۔

وزیراعلی شیوراج سنگھ چوہان نے بتایا کہ اب تمام سماجی، سیاسی، تفریحی، ثقافتی اور مذہبی تقریبات پوری صلاحیت کے ساتھ منعقد کی جائیں گی۔ ریاست میں مختلف مقامات پر میلوں کا انعقاد بھی کیا جا سکتا ہے۔

شادی تقریبات میں بھی بغیر کسی حد لوگ شرکت کر سکیں گے۔

وزیر اعلی نے بتایا کی ایک طویل عرصہ پابندیوں کے ساتھ گزرا ہے۔ پابندی ہٹانے کا فیصلہ مجموعی صورتحال پر غور و خوض کے بعد کیا گیا ہے۔

وزیر اعلی نے بتایا کہ تمام لوگ جو آخری رسومات اور جنازے میں شرکت کے خواہشمند ہے شریک ہو سکیں گے۔

رات کا کرفیو بھی ختم کیا جا رہا ہے، سنیما ہال، مالز، سوئمنگ پول، جم، یوگا سینٹر، ریستوران، کلب وغیرہ 100 فیصد گنجائش کے ساتھ کھولے جائیں گے۔

اسکول، کالج ہوسٹل، کوچنگ کلاسز پوری صلاحیت کے ساتھ چلائی جا سکیں گی۔

وزیراعلی شیوراج سنگھ چوہان نے کہا اب کسی بھی سطح پر کوئی لاپروائی نہ برتی جائے باہمی فاصلے کا احتیاط اور ماسک کا استعمال سب کے لیے ضروری ہوگا۔

ان لوگوں کو ہر بات کی اجازت ہوگی جن لوگوں نے اپنے ویکسینیشن کے دونوں ڈوز پوری کر لیے ہیں۔