کانگریس اور بی جے پی میں الزام تراشیوں کا سلسلہ جاری

ریاست مدھیہ پردیش کے وزیراعلی کمل ناتھ نے سابق وزیراعلی شیوراج سنگھ چوہان کے الزامات پر رد عمل ظاہر کرتے ہوئے کہا کہ 'ان کی حکومت سابقہ حکومت کے داغ کو صاف کرنے میں مصروف ہے۔'

کمل ناتھ نے شیو راج سنگھ چوہان کے الزامات کے پس منظر میں ٹویٹ کے ذریعے جواب دیتے ہوئے کہا کہ 'یہ وہی ریاست ہے جو آپ نے مجھے بربادی کی راہ پر لاکر سونپی تھی، نظم و نسق کے بدتر صورتحال میں، جرائم میں ،جسنسی زیادتی میں، بےروزگاری میں، ناقص غذائیت میں اور نوجوانوں کی بے روزگاری میں نمبر ون بنا کر چھوڑا تھا'۔

دوسری جانب بی جے پی رکن اسمبلی وشواس سارنگ نے جوابی الزام لگاتے ہوئے کہا کہ 'ان آٹھ مہینوں میں کمل ناتھ نے ریاست کا بیڑا غرق کر دیا ہے۔ صوبے میں قانونی انتظامات ٹھیک نہیں ہے۔ بچوں کو سرعام اغوا کر کے مار دیا جاتا ہے۔ کسان پریشان حال ہے، اسے کھاد اور بیج نہیں مل رہا ہے، بجلی نہیں مل رہی ہے۔ نوجوانوں کے روزگار کے مسائل جوں کے توں ہیں۔ گرمی میں لوگ پانی کے لیے ترس رہے ہیں۔ برسات میں ریاست میں سیلاب کے حالات ہیں اور وزیراعلی نے اب تک کسی بھی سیلاب سے متاثرہ علاقے کا دورہ نہیں کیا۔'