سندھیا نے لوگوں سے کانگریس کو ووٹ دینے کی اپیل کردی

مدھیہ پردیش میں ضمنی انتخابات کے لیے انتخابی تشہیر عروج پر ہے اور اسی کے تحت جمعہ کے روز جیوتی رادتیہ سندھیا، بی جے پی کی امیدوار امرتی دیوی کی حمایت کے لیے ڈھبرا آئے ہوئے تھے۔

مدھیہ پردیش کے ضلع گوالیار کے اسمبلی حلقہ ڈھبرا میں بی جے پی کی امیدوار امرتی دیوی کی حمایت میں ایک انتخابی ریلی سے خطاب کے دوران بی جے پی رہنما جیوتی رادتیہ سندھیا کی زبان پھسل گئی۔

سندھیا نے اپنے خطاب کے دوران یہ کہ دیا تھا کہ ڈھبرا کی عوام تین نومبر کو کانگریس کا بٹن دبائے گی لیکن انھیں جلد ہی اس بات کا احساس ہوگیا اور فوری طور پر کہا کہ کمل کے نشان والا بٹن دبایا جائے گا اور اسی کے ساتھ ہی کانگریس اپنا بوریا بستر سمیٹ کر یہاں سے روانہ ہوجائے گی۔

واضح رہے کہ بی جے پی رہنما جیوتی رادتی سندھیا پہلے کانگریس کے قدآور رہنماؤں میں شمار کیے جاتے تھے لیکن رواں برس ریاست کے وزیراعلی سے نا اتفاقی کے باعث انھوں نے اپنے حامی اراکین اسمبلی کے ساتھ بی جے پی میں شمولیت اختیار کرلی تھی۔

مدھیہ پردیش کی 28 اسمبلی سیٹوں پر ضمنی انتخابات ہورہے ہیں آج انتخابی تشہیر کا آخری دن ہے اسی کے ساتھ تین نومبر کو ووٹنگ کا عمل انجام پائے گا۔

ناظرین اس بات کا خیال رکھیں کہ ای ٹی وی بھارت اس ویڈیو کی تصدیق نہیں کرتا ہے۔