بھوپال: گیس حادثے کے متاثرین کو خراج عقیدت پیش

بھوپال گیس حادثے میں ہلاک ہونے والوں کو جمعیت علماء مدھیہ پردیش کی جانب سے خراج عقیدت پیش کیا گیا اور قرآن خوانی کر کے مرحوم کو ایصال ثواب پہنچایا گیا اور ان کے لئے دعائیں کی گئیں۔

ریاست مدھیہ پردیش میں دنیا کے سب سے بڑے صنعتی سانحے کو آج 36 سال پورے ہو چکے ہیں۔ اس موقع پر جمیعت علماء مدھیہ پردیش کی جانب سے آج اس خونچکاں حادثے میں ہلاک شدگان کو خراج عقیدت پیش کیا گیا۔

گیس حادثے میں ہلاک ہونے والوں کے ایصال ثواب کے لئے قرآن خوانی کا اہتمام کیا گیا اور ان کے لیے دعائے مغفرت کی گئی۔

جمعیت علماء مدھیہ پردیش کے جنرل سیکریٹری محمد کلیم نے کہا کہ 36 سال میں جتنی بھی حکومتیں آئیں، انہوں نے گیس متاثرین کے لیے کوئی کام نہیں کیا۔

گیس متاثرین کے دکھ اور تکلیف جیسی کی تیسی ہے بلکہ ان کی پریشانیوں میں اور بھی اضافہ ہو رہا ہے۔

جمعیت علماء کا مطالبہ ہے کہ گیس حادثے کے بعد بہت سے لوگوں پر کیسز درج کیے گئے ہیں اور جو لوگ اس سانحہ کے ذمہ دار ہیں، ان کو ان 36 سالوں میں کوئی سزا بھی نہیں دی گئی۔ اس لئے حکومت کو چاہیے کہ گیس متاثرین کو انصاف دلائے اور مجرموں کو سزا دے۔