Haj Tarbiyati Camp in Bhopal بھوپال کی مختلف مساجد میں حج تربیتی کیمپ

سفر حج پر جانے والے عازمین حج کو مکہ اور مدینہ میں جانے کے بعد حج کے ارکان صحیح طریقے سے کرنے اور وہاں کی ساری جانکاری کو لے کر بھوپال کی مختلف مساجد میں تربیتی کیمپ کا انعقاد کیا جارہا ہے۔ Haj Tarbiyati Camp in Bhopal

بھوپال: حج 2023 کے لیے مکہ مکرمہ اور مدینہ منورہ کے لیے پروازوں کا عمل اسی مہینے سے شروع ہونے جا رہا ہے جہاں عازمین نے اپنی تیاریاں مکمل کرنا شروع کر دی ہیں۔ وہیں علمائے کرام نے انہیں تربیتی کیمپ کے ذریعے حج اور سفر کے دوران اختیار کیے جانے والے طریقوں پر تربیت دینے کا عمل شروع کر دیا ہے۔ شہر میں گزشتہ کئی دنوں سے جاری یہ مہم اب مزید زور پکڑتی جارہی ہے۔ آج حج تربیتی کیمپ لال مسجد منشی حسین خان میں منعقد کیا گیا۔ بھوپال کے سابق کونسلر شاہد علی نے بتایا کہ صبح 9 بجے سے شروع ہوئے اس تربیتی کیمپ میں قاضی شہر سید مشتاق علی ندوی اور شہر مفتی عبدالکلام خان قاسمی نے حج سے متعلق اہم باتیں بتائی۔

انہوں نے بتایا کہ اس دوران حاجیوں کو سفر کے دوران ان کے رویے، اقامہ کی ادائیگی کا طریقہ، کیا کرنا ہے اور کیا نہ کرنا وغیرہ کے بارے میں معلومات دی جائیں گی۔ شاہد علی نے کہا کہ وہ بھوپال کے اطراف کے حاجیوں کے لیے لگائے گئے اس کیمپ میں دیگر لوگوں نے بھی حصہ لیا ہے۔ شاہد علی نے حج کمیٹی کی طرف اشارہ کرتے ہوئے کہا کہ حج پر جانے میں محض ایک ہفتے کا وقت بچا ہے لیکن افسوس کی حج کمیٹی کی جانب سے کسی بھی طرح کی حج تربیت اب تک نہیں دی گئی ہے اور نہ کوئی سہولیات فراہم کی گئی ہیں۔ حج تربیتی کیمپ میں حصہ لینے آئے عازمین کا تربیتی کیمپ کے تعلق سے کہنا ہے کہ ہم جہاں جانے کا برسوں سے خواب دیکھ رہے تھے اسے اللہ تعالیٰ نے قبول فرمایا ہے جس کی ہمیں بے حد خوشی ہے۔

عازمین نے کہا کہ ہم حج کے دوران اللہ سے ملک میں امن وامان اور آج جس طرح کے حالات ملک میں ہیں اسے بہتر کرنے کی دعا مانگیں گے۔ عازمین نے کہا آج ہمیں تربیتی کیمپ میں بہت کچھ سیکھنے کو ملا ہے جو ہمیں سفر حج پر بہت کام آئے گا۔ حج تربیتی کیمپ کے ٹرینر نے بتایا کہ ٹریننگ ہر چیز میں ضروری ہوتی ہے تاکہ انسان کوئی بھی کام آسانی کے ساتھ کرسکے۔ اور سفر حج ایک بہت اہم سفر ہے اور اس کی تربیت حاصل کرنا بہت ضروری ہے۔ تاکہ ہم اس عظیم سفر کو بہت آسانی کے ساتھ اور سارے ارکان صحیح طریقے سے ادا کیے جاسکے۔ اس لیے ہماری ذمہ داری ہے کہ ہم جب بھی سفر حج پر جائے تو حج کے ارکان کس طرح سے ادا کرنا ہے اور وہاں پر کیا کرنا چاہیے یہ ہمیں آنا چاہیے اور ہم اسی بات کی تربیت دیتے ہیں۔ تاکہ اللہ تعالی ہمارے اس سفر کو قبول فرمائے۔

واضح رہے کہ دارالحکومت بھوپال میں حج تربیتی کیمپ 13 مئی کو مسجد ساجدہ سلطان میں، 14 مئی مسجد ماجی صاحبہ، 20 مئی مسجد مقدس نگر، 21مئی مسجد جھنگیے والی جہانگیر آباد، اسی کے ساتھ دیگر مساجد میں بھی حج تربیتی کیمپ کا انعقاد کیا جائے گا۔ ان حج تربیتی کیمپسز کے ذریعے حج سے متعلق معلومات اور حج کے دوران حج کی روانگی سے واپسی تک تمام اہم باتوں کی وضاحت کی جاتی ہے۔