Freedom Fighters Photo Exhibition بھوپال میں مجاہدین آزادی کی تصاویری نمائش

مدھیہ پردیش کے بھوپال میں بے نظیر انصار ایجوکیشن سوسائٹی کی جانب سے جشن یوم آزادی کے موقعے پر مجاہدین آزادی کی تصاویر اور ان کے کارناموں سے متعلق نمائش کا اہتمام کیا گیا۔

بھوپال:ریاست مدھیہ پردیش کے دارالحکومت بھوپال کی تنظیم بے نظیر انصار ایجوکیشن کے زیر اہتمام سہ روزہ مجاہدین آزادی کی تصاویر کی نمائش کا اہتمام کیا گیا اور ان کے کارناموں کو پیش کیا گیا۔ جس میں بھوپال کی بڑی تعداد میں طلبات اور لوگوں نے شرکت کی۔ اس موقع پر سوسائٹی کے روح رواں ایم ڈبلیو انصاری نے کہا کہ ہندوستان کو آزاد کرانے میں ہر قوم کا برابر کا حصہ ہے۔ آزادی ہماری ساجھی وراثت ہے۔ اس حقیقت سے نئی نسل کو واقف کرانا بہت ضروری ہے۔ انہوں نے کہا بھارت کی آزادی ساجھی وراثت کی نایاب مثال ہے۔ یہ ایک ایسی وراثت ہے جس کی حفاظت ہر بھارتیہ پر فرض ہے۔ ساجھی وراثت نہ صرف بھارت کی مشترکہ تہذیب کی امین ہے بلکہ اسی میں بھارت کی روح بستی ہے۔

صدرنگ یہ فضا میرے ہندوستان کی ہے۔
خوشبو اسی میں دیکھیے سارے جہاں کی ہے۔

بھارت کی عظمت مدھیہ پردیش کی شان و شوکت اور بھوپال کو خوبصورت بنانے میں سبھی ملک کی باشندگان نے اپنا خون جگر دیا ہے۔ لیکن اج چند مفاد پرست عناصر کے سبب ملک کی عظمت اور مشترکہ تہذیب کے نقوش دھندلے پڑ رہے ہیں۔ ایسے میں ساجھی وراثت کے وارثین کی نہ صرف ذمہ داری بڑھ گئی ہے بلکہ ایک بار پھر اسی اتحاد و اتفاق کو پیش کرنے کی ضرورت ملک کو درپیش آگئی ہے۔ جو ان کی نایاب وراثت کا حصہ ہے۔

انہوں نے کہا ہم سب جانتے ہیں کہ بھارت مختلف تہذیبوں کا گلدستہ ہے اور اگر اس گلدستے میں سے مختلف رنگوں کو نکال کر صرف ایک رنگی پھول ہی لگائے جائیں گے تو اس کی خوبصورتی کا رنگ پھیکا پڑ جائے گا۔ مادر وطن کو تو جنت نشاں کہتا کہا جاتا ہے اور جنت میں کبھی بھی ایک رنگی رنگ نہیں ہو سکتے ہیں۔ کسی شاعر نے بہت خوب کہا ہے ۔

کوئی چمن کہیں جنت نشان نہیں ہوتا۔
اگر زمین پر ہندوستان نہیں ہوتا