بھوپال: عارف مسعود کی قیادت میں احتجاج

بھوپال کے رکن اسمبلی عارف مسعود نے مرکزی حکومت کے بجٹ اور ریاست میں روکے گئے ترقیاتی کاموں کو لے کر میونسپل کارپوریشن کا کیا گھیراؤ کیا۔

مدھیہ پردیش کے دارالحکومت بھوپال کے مرکزی اسمبلی حلقے کے رکن اسمبلی عارف مسعود کی قیادت میں مرکزی حکومت کے ذریعہ لائے گئے بجٹ اور ریاست میں روکے گئے ترقیاتی کاموں کو لے کر احتجاج کیا گیا، جس میں آج میونسپل کارپوریشن کا گھیراؤ کیا گیا۔

اس موقع پر عارف مسعود نے کہا کہ 'افسوس کی بات ہے کہ ہم میونسپل کارپوریشن کے ذمہ داران سے ملنے آئے ہیں اور وہ یہاں سے غائب ہیں۔'

انہوں نے کہا کہ 'یہاں وہ سب غریب لوگ آئے ہیں جنہیں ریاست کے وزیر اعلی نے وزیراعظم کی اسکیم کے تحت مکان دینے کی بات کہی تھی، جو ابھی تک نہیں دیے گئے ہیں۔'

ساتھ ہی انہوں نے کہا کہ 'میرے اسمبلی حلقے میں کوئی کام نہیں ہونے دیا جا رہا ہے اور کام کرنے والوں کو ادائیگی بھی نہیں کی جا رہی ہے جس سے میرے اسمبلی حلقے کے ترقیاتی کام رک گئے ہیں۔'

عارف مسعود نے کل پیش کیے گئے مرکزی بجٹ پر کہا کہ 'ملک میں وزیراعظم نریندر مودی سب بیچ رہے ہیں اور یہاں ریاست میں میونسپل کارپوریشن۔'

انہوں نے کہا کہ 'اگر ہمارے مطالبات جلد سے جلد پورے نہیں کیے گئے تو ہم جس طرح سے دہلی میں کسان احتجاج پر بیٹھے ہیں، ہم اسی طرح سے میونسپل کارپوریشن کے سامنے احتجاج کریں گے۔'