بھوپال: آئین بچاؤ مہم کے تحت کانگریس کا یک روزہ اپواس

بھوپال مرکزی حلقے کے رکن اسمبلی عارف مسعود نے آج یوم جمہوریہ کے موقع پر آئین بچاؤ مہم چلائی اور یک روزہ اپواس بھی رکھا۔

مدھیہ پردیش کے دارالحکومت بھوپال کے مرکزی اسمبلی حلقے کے رکن اسمبلی عارف مسعود نے آج جشن یوم جمہوریہ کے موقع پر آئین بچاؤ مہم کے تحت یک روزہ اوپواس کا اہتمام کیا۔ انہوں نے وزیر اعظم نریندر مودی اور ریاست کے وزیر اعلی شیوراج سنگھ چوہان کو آئین کی کتاب بھیج کر مطالبہ کیا ہے کہ آئین کی حفاظت کو یقینی بنایا جائے۔

اس موقع پر رکن اسمبلی عارف مسعود کے ساتھ بڑی تعداد میں کانگریس کارکنان نے اوپواس رکھا۔ وہیں، کسانوں کی حمایت میں ٹریکٹر پر سوار ہو کر آئے رکن اسمبلی عارف مسعود نے کہا کہ ملک مشکل دور سے گزر رہا ہے۔ کسان، مزدور، طلباء اور نوجوانوں پر زبردست طریقے سے حملہ کیا جا رہا ہے۔ جو آواز بلند کر رہے ہیں ان کی آواز کو دبا دیا جا رہا ہے، انہیں جیلوں میں بند کیا جا رہا ہے اور مرکزی حکومت زرعی قوانین لاکر کسانوں کو بڑے تاجروں کا غلام بنا رہی ہے۔

عارف مسعود نے کہا کہ اب ملک میں سبھی آئینی ادارے خطرے میں ہیں۔ سپریم کورٹ، سی بی آئی آئی، آر بی آئی اور الیکشن کمیشن سب پر خطرہ نظر آ رہا ہے۔

ملک میں اقلیتی طبقہ اور دلت طبقہ بھی خطرے میں ہے۔

اس طرح ملک میں افراتفری کا ماحول بنا ہے اور ہم چاہتے ہیں کہ ہمارا بھارت قومی یکجہتی کی مثال بنے اور لوگ امن و سکون سے ملک میں رہ سکیں۔ یہی وجہ ہے کہ آج یہ احتجاج اور یک روزہ اوپواس رکھا گیا ہے۔