ریاست مدھیہ پردیش کے سینیئر رہنما اور سابق وزیر اعلیٰ کمل ناتھ نے ریاست مدھیہ پردیش کے نومنتخب گورنر منگو بھائی پٹیل سے ملاقات کرکے ریاست کے حالات سے واقف کروایا-
اس موقع پر میڈیا سے بات کرتے ہوئے انہوں نے کہا کہ انہوں نے گورنر سے ملاقات کرکے انہیں ریاست میں ایس سی- ایس ٹی طبقے کے افراد کے حالات سے واقف کروایا- ان لوگوں کے ساتھ ریاست میں اتنے حادثات پیش آئے ہیں جتنے ملک کی تاریخ میں پیش نہیں آئے-
انہوں نے کہا کہ گورنر منگو بھائی پٹیل کو قبائلی علاقوں میں کام کرنے کا تجربہ ہے اور انہوں نے سماجی فلاح و بہبود کے لئے بھی کام کیا ہے۔
انہوں نے کہا کہ ان کی یہ کوشش ہے کہ اس طبقہ کے حقوق کی حفاظت کی جائے۔
کمل ناتھ کے مطابق انہوں نے گورنر کو یہ بھی بتایا کہ ریاست میں ہر طبقہ پریشان ہے۔ کسان، چھوٹے کاروباری یریشان ہیں، نوجوان بے روزگار ہے۔ بےروزگاری کم ہونے کے بجائے بڑھ رہی ہے۔ معاشی حالات بھی خراب ہیں-
او بی سی ریزرویشن کو لے کرکمل ناتھ نے کہا کہ ہماری حکومت نے اس کے لیے قدم اٹھائے تھے اور اس کے لئے ایک خاکہ تیار بھی کیا تھا- جسے آج بھارتیہ جنتا پارٹی کی شیو راج سنگھ چوہان کی حکومت کو نافذ کرنا چاہیے- انھوں نے کہا کہ آج عوام اس بات سے واقف ہیں کہ ریاست کی حالت کیا ہے۔
انہوں نے کہا کہ نمونیہ ہو نے کی وجہ سے میں گیارہ دن اسپتال میں تھا۔ تاہم اب پوری طرح سے صحتیاب ہوں۔ اب وہ ریاست کے مختلف مقامات کا دورہ کریں گے۔
ضمنی انتخابات کے تعلق سے انہوں نے کہا کہ وہ اس سلسلے میں روزانہ کی بنیاد پر میٹنگ کررہے ہیں۔ مناسب وقت آنے پر امیدواروں کے ناموں کا اعلان کریں گے۔
2023 میں حکومت سازی کے سوال پر انہوں نے کہا کہ مجھے مدھیہ پردیش کی عوام پر پورا بھروسہ ہے کہ عوام سب سے پہلے سچائی کا ساتھ دے گی-
مہنگائی کے سوال پر انہوں نے کہا کہ آج مہنگائی کی کوئی حد نہیں ہے۔ وزیر اعظم نریندر مودی نے انتخابات سے قبل وعدے کئے تھے۔ تاہم 2013_14 کے بعد ان وعدوں کا جائزہ لیں تو حقیقت عوام کے سامنے ہے۔
