مذہبی مقامات سے پابندی ختم کی جائے، مدھیہ پردیش کانگریس کا مطالبہ

ریاست مدھیہ پردیش میں کانگریس پارٹی کے کارکنان نے ریاست کے وزیراعلی شیو راج سنگھ سے لاک ڈاون ختم کرنے اور مذھبی مقامات کو کھولنے کا مطالبہ کیا ہے۔

عالمی وبا کورونا کی دوسری لہر کا مدھیہ پردیش میں شدیداثر دیکھا گیا جس کی وجہ سے ریاست میں تقریبا 2 ماہ تک لاک ڈاؤن نافذ رہا۔ حکومت اور ضلع انتظامیہ کی جانب کورونا گائیڈ لائن پر سختی سے عمل کرتے ہوئے تمام مذہبی مقامات کو بھی بند کردیا گیا۔

فی الحال ریاست میں کورونا وبا کی دوسری لہر پر قابو پالیا گیا ہے۔ حکومت اور ضلع انتظامیہ نے رفتہ رفتہ ان لاک کا عمل شروع کیا ہے۔ یہاں تک کہ مال اور ہاٹ بازار بھی پوری گنجائش کے ساتھ کھولے جا رہے ہیں۔ وہیں ریاست میں مذہبی مقامات پر پابندی برقرار ہے۔ مدہبی مقامات پر صرف 5 افراد کو ہی عبادت کی اجازت دی جارہی ہے۔

عیدالاضحی کے موقع پر کانگریس رہنما منور کوثر اور دیگر سماجی کارکنان نے مذہبی مقامات سے پابندی ہٹانے کا مطالبہ کیا۔ اس سلسلہ میں آج وزیراعلی شیوراج سنگھ چوہان کو ایک میمورنڈم بھیجا گیا۔

اب دیکھنا یہ ہے کہ جس طرح ریاست میں ان لاک کا عمل جاری ہے وہیں مذہبی مقامات پر نافذ پابندی کو کب ہٹایا جائے گا۔