دلت جوڑے سے مارپیٹ، کلکٹر اور ایس پی معطل

گنا کے جگن پور گاؤں میں تجاوزات ہٹانے کے دوران دلت جوڑے سے مار پیٹ کے سبب وزیر اعلیٰ شیوراج سنگھ چوہان نے کلکٹر ایس وشوناتھ اور پولیس سپرنٹنڈنٹ (ایس پی) کو فی الفور معطل کرنے کی ہدایت دی۔

ریاست مدھیہ پردیش کے ضلع گنا کے جگن پور گاؤں میں تجاوزات ہٹانے کے دوران غریب جوڑے کو بری طرح زد و کوب کرنے کی خبریں آنے کے بعد وزیر اعلیٰ شیوراج سنگھ چوہان نے کلکٹر ایس وشوناتھ اور پولیس سپرنٹنڈنٹ (ایس پی) کو فی الفور معطل کرنے کی ہدایت دی۔

راہل گاندھی کا ٹویٹ

مسٹر چوہان نے بھوپال میں اس واقعہ سے متعلق معلومات حاصل کرنے کے بعد کہا کہ کسی بھی طرح کی ظلم و بربریت برداشت نہیں کی جائے گی۔

انہوں نے کہا کہ جگن پور گاؤں کی گذشتہ روز کے واقعے کی اعلیٰ سطحی تفتیش کا حکم دیا گیا ہے۔ اس میں جو بھی مجرم پایا جائے گا اس کے خلاف سخت سے سخت کاروائی کی جائے گی۔

خیال رہے کہ جگن پور گاؤں میں گزشتہ روز تجاوزات ہٹانے کی کاروائی کے دوران راجکمار اہیروار اور ان کی اہلیہ ساویتری بائی کو پولیس اہلکاروں نے بری طرح پیٹا تھا جس کے بعد اس جوڑے نے زہر پی کر خودکشی کی کوشش کی تھی۔

وہیں اس سلسلے میں کانگریس رہنما راہل گاندھی نے اس غریب جوڑے کی ویڈیو سوشل میڈیا پر شیئر کرتے ہوئے کہا کہ ' ہماری لڑائی اسی سوچ کے خلاف ہے۔'

سرکاری زمین پر قبضہ کرنے کا ملزم گبو پاردی اس جوڑے کے علاوہ ان کے بچوں کو بھی جراثیم کُش پینے کے لیے مشتعل کر رہا تھا۔

اس دوران پولیس اہلکاروں نے اس جوڑے کے ساتھ مارپیٹ بھی کی۔ اس واقعہ کی ویڈیو سوشل میڈیا پر وائرل ہو گئی۔

راجیہ سبھا رکن جیوتی رادتیہ سندھیا نے دیر رات ٹویٹ کیا کہ گنا کے بد بختانہ واقعہ کا نوٹس لیتے ہوئے وزیر اعلیٰ نے کلکٹر اور ایس پی کو فوراً ہٹانے کی ہدایت دے دی ہے۔

علاوہ ازیں سابق وزیر اعلیٰ کمل ناتھ اور سابق وزیر جے وردھن نے شیوراج حکومت کو ہدف تنقید بنایا ہے۔