اندور میں کورونا متاثرین کی تعداد میں مسلسل اضافہ ہو رہا ہے۔ اندور میں متاثرین کی تعداد 6000 سے بھی زیادہ ہوگئی ہے جبکہ اس مہلک وبا سے 342 افراد ہلاک ہوگئے ہیں۔ 1500 سے زائد مریض زیر علاج ہیں۔ کورونا پر قابو پانے کے لیے انتظامیہ کی جانب سے ہر ممکن کوشش کی جا رہی ہے۔
کورونا وائرس کی وجہ سے لوگوں کا اسپتال جانا دشوار ہوگیا ہے، ایک تو کورونا کا خوف اور دوسرا معاشرے کا، جو شک کی نگاہ سے دیکھتا ہے۔
وہیں اسپتالوں کے بلڈ بینک میں خون کی کمی ہوگئی ہے، جس کی وجہ سے مریضوں کو پریشانیوں کا سامنا کرنا پڑرہا ہے، اسی کو دیکھتے ہوئے شہر کی سماجی تنظیم آواز گروپ نے کورونا وبا کے دور میں بلڈ ڈونیشن کیمپ کا انعقاد کیا۔جس میں بڑی تعداد میں مسلم نوجوان اور خواتین نے خون عطیہ کیا اور کہا کہ یہ انسانی خدمات کی بہترین مثال ہے جب کہ کورونا وبا کی وجہ سے اسپتالوں میں خون کی کمی ہوگئی ہے، ایسے میں ایکسیڈنٹ اور دیگر مریضوں کو کافی پریشانیوں کا سامنا کرنا پڑ رہا ہے۔