ریلوے ٹریک کے قریب دھماکہ

ریاست مدھیہ پردیش کے ضلع بیتول کے پاڈھرنا ریلوے اسٹیشن کے نزدیک ایک تعمیراتی کمپنی کے ذریعہ کئے گئےدھماکے کی وجہ سے کچھ دیر کے لیے ریلوے کی آمد و رفت میں رکاوٹ پیدا ہوگئی۔

حالانکہ بعد میں ٹریک درست کرنے کے ساتھ ہی ریلوے کی آمد و رفت بحال کردی گئی۔
ریلوے ذرائع کے مطابق کل شام ہونے والے اس حادثے کے بعد بند ہوئے ریلوے ٹریک کی وجہ سے کئی ایکسپریس گاڑیوں کودوسرے اسٹیشنوں پر روک دیا گیا تھا۔

تفصیلات کے مطابق چچنڈا ریلوے اسٹیشن سے آگے گھڈن کھاپا گھاٹ پر پتھر کاٹ کر ریلوے لائن بنانے کا تعمیری کام جاری تھا جس کے دوران پتھر کاٹنے کے لیے تعمیراتی کمپنی نے ایک دھماکہ کیا جس میں بڑے بڑے پتھر ڈاؤن ٹریک پر آگرے، یہی نہیں وہاں کام میں لگی جے سی بی مشین بھی ریلوے لائن پر گرگئی تھی۔

اس کی وجہ سے ٹریک اور او ایچ ای کیبل کو نقصان ہوا ہے۔

بتایا جارہا ہے کہ اس حادثے کی وجہ سے سمپرک کرانتی ،گنگا کاویری اور ناگپور پسنجر ٹرینوں کو مختلف اسٹیشنوں پر روک دیا گیا تھا۔

حالانکہ بعد میں ٹریک کو ٹھیک کرنے کے ساتھ ہی ریلوے ٹریفک بحال کردیا گیا۔