بھوپال: پیدائشی طور پر معزور بچوں کے لیے راحت رسانی کا کام جاری

ریاست مدھیہ پردیش میں لاک ڈاؤن کے درمیان دیگر سماجی تنظیموں کے ساتھ بھوپال گیس متاثرین تنظیم چنگاری ٹرسٹ ضرورتمندوں کے ساتھ دیگر مقامات پر راحت رسانی کا کام کر رہی ہے۔

مدھیہ پردیش کے دارالحکومت بھوپال میں لاک ڈاؤن کے مدنظر ضرورت مندوں اور غریبوں کو مدد پہنچانے کی خاطر کئی تنظیمیں کام کر رہی ہیں۔ بھوپال کی تنظیم چنگاری ٹرسٹ بھی گزشتہ تیرہ برسوں سے ان گیس متاثرین کے معذور بچوں کے علاج کے لیے کام کر رہی ہے جو پیدائشی معذور ہیں۔

یہ تنظیم ان کے علاج کے ساتھ ساتھ باز آبادکاری کے کام بھی انجام دے رہی ہے، گیس متاثرین بچوں میں 130 کے اہلخانہ ایسے ہیں جو مزدور طبقے سے تعلق رکھتے ہیں، اس لیے یہ ٹرسٹ ان کے لیے راشن کٹ اور 48 بچوں کے یہاں لگاتار دوا بھی پہنچا رہی ہے۔

وہیں یہ تنظیم 26 مارچ سے لگاتار گیس متاثرین کے ساتھ عام لوگوں کے گھروں تک بھی کھانا پہنچانے کا کام کر رہی ہے تنظیم کے مطابق اب ضرورتمندوں کے ساتھ یہ راحت ان لوگوں تک بھی پہنچائی جارہی ہے جو شرمندگی کی وجہ سے سامنے نہیں آرہے ہیں۔

یہ تنظیم جہاں گیس متاثرین کے ساتھ دیگر جگہوں پر راحت پہنچا رہی ہے، وہیں ضلع انتظامیہ کے کہنے پر وہ جگہ جو کنٹینمینٹ زون میں شامل ہیں وہاں بھی راحت پہنچانے کا کام کر رہی ہے۔