بھوپال: کانگریس اراکین اسمبلی کی واپسی

ریاست مدھیہ پردیش میں جاری سیاسی بحران کے دوران کانگریس نے اپنے اراکین اسمبلی کو جے پور بھیج دیا تھا لیکن اب ان تمام کی واپسی ہوچکی ہے اور انہیں شہر کی مشہور ہوٹل کورٹ یارڈ میرٹ میں ٹھہرایا گیا ہے۔

بھوپال پہنچے مدھیہ پردیش کانگریس کے اراکین اسمبلی کو ان کے گھر جانے کی بھی اجازت نہیں دی گئی اور پوری ہوٹل کو پولیس نے چھاؤنی میں تبدیل کردیا ہے۔

جے پور سے لوٹے رکن اسمبلی اور پی ڈبلیو ڈی وزیر سجن سنگھ ورما نے نامہ نگاروں سے بات چیت کرتے ہوئے کہا کہ 'آزادی کے بعد سے اب تک ایسے حالات نہیں ہوئے جو اب نظر آ رہے ہیں۔

انہوں نے کہا کہ 'یہ جمہوریت کا قتل ہے اور سیاست کی روایتوں کے خلاف ہے۔

سجن سنگھ ورما نے پارٹی چھوڑ کر گئے اراکین اسمبلی کے تعلق سے کہا کہ 'یہ پرندے بھٹک گئے ہیں لیکن جلد ہی اپنے گھونسلوں میں واپس لوٹ آئیں گے اور جب کانگریس پارٹی اپنا فلور ٹیسٹ دے گی تو یہ ہمارے ساتھ کھڑے نظر آئیں گے۔