AIMIM In Bhopal اے آئی ایم آئی ایم کا بھوپال میں اجتماعی نکاح رجسٹریشن پروگرام کا اعلان

آل انڈیا اتحاد المسلمین نے دارالحکومت بھوپال میں غریب اور بے سہارا مسلم لڑکے اور لڑکیوں کی اجتماعی شادی مفت کرانے کا اعلان کیا ہے۔ اے آئی ایم آئی ایم کی جانب سے اعلان کردہ منصوبے کے مطابق انہیں سارا ساز و سامان بھی دیا جائے گا۔

بھوپال:ریاست مدھیہ پردیش کے دارالحکومت بھوپال میں میونسپل کارپوریشن انتخابات کے مدنظر ریاست کی دوسری سیاسی جماعتوں کی طرح آل انڈیا اتحادالمسلمین کی سرگرمیوں میں بھی زبردست اضافہ ہوا ہے۔ آل انڈیا اتحاد المسلمین اس بار ہونے والے اسمبلی انتخابات میں بھی سرگرم نظر آئے گی۔

آل انڈیا اتحادالمسلمین کے سیکریٹری توقیر نظامی نے اعلان کیا ہے کہ جس طرح سے پارٹی کے قومی صدر اسد الدین اویسی نے پورے ملک کے ساتھ حیدرآباد میں ایک ماڈل پیش کیا ہے۔ ویسے ہی ہم ریاست مدھیہ پردیش کے دارالحکومت بھوپال کے نریلا اسمبلی حلقے سے شروع کرنے جا رہے ہیں جسے پوری ریاست میں بھی آگے بڑھایا جائے گا۔

انہوں نے کہا کہ حالات کو مدنظر رکھتے ہوئے آل انڈیا اتحاد المسلمین وہ غریب ضرورت مند اہل خانہ جو اپنے بیٹوں اور بیٹیوں کی غربت کے سبب شادیاں نہیں کر پا رہے ہیں۔ ان کے لئے دیگر سماجی تنظیمیں، آل انڈیا اتحادالمسلمین اور نریلا اسمبلی حلقے کے کچھ لوگوں کے ساتھ مل کر ہم نے اجتماعی شادیوں کی تقریب کرنے کا منصوبہ بنایا ہے۔

ان کا کہنا ہے کہ نریلا اسمبلی حلقے کے لوگوں سے اپیل کی کے جو اپنے لڑکے یا لڑکی کی شادی اس اجتماعی نکاح تقریب میں کروانا چاہتے ہیں تو وہ لڑکے یا لڑکی کی پاسپورٹ سائز فوٹوں، ان کے والدین کی پوری معلومات اور ساتھ میں شادی میں لگنے والے سارے پیپر آل انڈیا اتحادالمسلمین کے آفس میں جمع کروائیں۔ یہاں ان کا رجسٹریشن کیا جائے گا۔

توقیر نظامی نے کہا کہ آل انڈیا اتحادالمسلمین کے ذریعے کی جانے والی یہ اجتماعی شادیاں پہلی بار منعقد کی جا رہی ہیں۔ اس لئے ہم اس میں سو لڑکے اور سو لڑکیوں کے نکاح کرانے جا رہے ہیں۔ اس میں ہم لڑکے اور لڑکی کے اہلخانہ کے ساتھ ان کے مہمان کے کھانے پینے کا بھی انتظام کریں گے۔ وہیں اس اجتماعی نکاح میں ہم تحفے کے طور پر لڑکے اور لڑکی کو مناسب سامان بھی دیں گے۔