ریاست مدھیہ پردیش کے دارالحکومت بھوپال میں گیس متاثرین کو یاد کرنے کے لیے 'ادھیوگ سنگھٹن' کے ذریعہ جلسہ خراج عقیدت کا انعقاد کیا گیا۔ جس میں مختلف سیاسی، سماجی کارکنان اور بڑی تعداد میں گیس متاثرین جمع ہوئے اور تنظیم کے قائد مرحوم عبدالجبار کو خراج عقیدت پیش کیا-
پروگرام میں کمل ناتھ سرکار میں گیس راحت وزیر جناب عارف عقیل کے زیر صدارت منعقدہ جلسہ خراج عقیدت میں علاقائی رکن اسمبلی عارف مسعود اور عبدالجبار کو گیس متاثرین کے لیے کی گئی جدوجہد اور ان کے ساتھ گزارے ہوئے پلوں کو یاد کیا- اپنی صدارتی خطاب میں عارف عقیل نے مرحوم عبدالجبار کی خدمات کو خراج عقیدت پیش کرتے ہوئے کہا کہ بھوپال کے شاہجہانی پارک کے ایک گوشے میں مرحوم قائد کی یاد میں ایک یادگار قائم کی جائے گی-
اس موقع پر رکن اسمبلی عارف مسعود نے کہا کہ بھوپال سے لے کر پارلیمنٹ تک اور عدالتوں تک پہنچ کر گیس متاثرین کی لڑائی لڑنے والے عبدالجبار کی آواز آج خاموش ہوگئی ہے۔ انہوں نے مزید کہا کہ عبدالجبار گیس متاثرین کے ساتھ ہمیشہ کھڑے رہے۔ اب ذمہ داری تنظیم کی ہے کہ عبدالجبار کی آواز کو ہمیشہ کے لیے بلند رکھے۔