وزیراعلیٰ کے رشتہ دار کی ہراسانی سے تنگ خاندان نے خودکشی کی دھمکی دی

وزیراعلیٰ شیوراج سنگھ چوہان کے ایک رشتہ دار کی جانب سے مبینہ طور پر ہراساں کئے جانے سے پریشان ایک شخص نے اپنے بیوی اور بچوں کے ساتھ ایک پانی ٹنکی پر چڑھ گیا اور خودکشی کرلینے کی دھمکی دی۔

مدھیہ پردیش کے ضلع بھوپال میں وزیراعلیٰ شیوراج سنگھ چوہان کے رشتہ داروں کی جانب سے مبینہ طور پر ہراساں کیے جانے سے پریشان ہوکر ایک خاندان نے خودکشی کرلینے کی دھمکی دی ہے۔ ایک شخص اپنے بیوی بچوں کے ساتھ ٹنکی پر چڑھ گیا اور شیوراج سنگھ چوہان کے رشتہ داروں کی جانب سے ہراساں کئے جانے کا الزام عائد کیا اور پورے خاندان کے ساتھ ٹنکی سے چھلانگ لگانے کی دھمکی دی جبکہ مقامی انتظامیہ کی جانب سے اسے ٹنکی سے نیچے محفوظ اتارنے کےلیے کوشش کی جارہی ہے۔ متاثرہ خاندان انتظامیہ سے اپنی زمین کا مطالبہ کر رہا ہے۔

اطلاعات کے مطابق یہ معاملہ رائے سین ضلع کے بھوج پور کا ہے، جہاں متاثرہ شخص رتیش گوسوامی نے دھننجے چوہان پر خود کو شیوراج سنگھ کا رشتہ دار بتاکر اسے ایک عرصے سے ہراساں کرنے کا الزام عائد کیا ہے۔ رتیش گوسوامی نے کہا کہ شیوراج سنگھ چوہان کے رشتہ دار کے خلاف پولیس میں شکایت کرنے کے باوجود اس کے خلاف کوئی کاروائی نہیں کی گئی۔ گوسوامی نے الزام عائد کیا کہ گزشتہ تین سالوں سے اسے اپنے کھیتوں میں کاشتکاری کرنے سے روکا جارہا ہے اور ان کی کھڑی فصل پر ٹریکٹر چلاکر برباد کردیا گیا۔

رتیش گوسوامی نے بتایا کہ اس معاملے کی شکایت کلکٹر اور دیگر عہدیداروں سے بھی کی گئی لیکن کوئی کاروائی نہیں ہوئی۔ 3 سال تک مسلسل کاشتکاری نہیں کرنے سے وہ 3 لاکھ روپئے کا مقروض ہوگیا اور اب خاندان کو پالنا مشکل ہوگیا ہے۔ گوسوامی نے کہا کہ اسے جان سے مارنے کی دھمکی بھی دی جارہی ہے۔

وزیر اعلیٰ شیوراج سنگھ کے رشتہ دار سے پریشان کنبہ نے خودکشی کی کوشش کی

انہوں نے الزام لگایا کہ وزیراعلیٰ کا قریبی رشتہ دار ہونے کی وجہ سے حکام کی جانب سے دھننجے کے خلاف کوئی کاروائی نہیں کی جارہی ہے۔ انہوں نے بتایا کہ اس معاملہ کی شکایت وشواس سارنگ سے بھی کی گئی جبکہ وزیر نے معاملے کو جلدازجلد حل کرنے کا تیقن دیا تھا۔