تازہ جھڑپ کے بعد لداخ شاہراہ سویلین ٹریفک کے لیے بند

لداخ یونین ٹریٹری کو وادی کشمیر کے ساتھ جوڑنے والی سرینگر – لیہہ شاہراہ پر سویلین گاڑیوں کی آمد و رفت پیر کی صبح روک دی گئی۔

مشرقی لداخ میں بھارت اور چین کی افواج کے درمیان تازہ جھڑپ کی خبر سامنے آنے کے بعد 434 کلو میٹر طویل سرینگر لیہہ شاہراہ کو سویلین ٹریفک کے لیے بند کر دیا گیا ہے۔

تفصیلات کے مطابق کرگل یا لیہہ جانے والی سویلین گاڑیوں کو شاہراہ پر کئی ایک مقامات پر روک دیا گیا ہے۔ تاہم فوجی گاڑیاں معمول کی طرح چل رہی ہیں'۔

واضح رہے کہ گزشتہ دو ماہ سے لداخ کے گلوان وادی میں بھارتی اور چینی فوجیوں کے مابین کشیدگی جاری ہے۔ 15 جون کو دونوں افواج کے مابین ہونے والی جھڑپ میں ایک کرنل سمیت کم سے کم بیس فوجی اہلکار ہلاک جبکہ درجنوں زخمی ہوئے تھے۔