Army Vehicle Accident in Ladakh لداخ میں فوجی گاڑی حادثے کا شکار، 9 جوان ہلاک

لداخ کے لہیہ میں فوجی گاڑی ڈرائیور کے قابو سے باہر ہو کر گہری کھائی میں جاگری جس کے نتیجے میں گاڑی میں سوار جونیئر کمیشنڈ آفیسر سمیت نو فوجی ہلاک ہوگئے ہیں۔

لداخ: حکام نے بتایا کہ ہفتہ کے روز لداخ کے لیہہ ضلع میں فوجی گاڑی سڑک سے پھسل کر گہری کھائی میں جاگری۔ اس حادثہ میں نو فوجیوں کے ہلاک ہونے کی اطلاع ہے۔ حکام نے بتایا کہ یہ حادثہ ہفتہ کی شام جنوبی لداخ کے نیوما کے کیاری علاقہ میں پیش آیا۔ ان کا کہنا تھا کہ جائے وقوعہ پر ریسکیو آپریشن جاری ہے۔

دفاعی ذرائع نے بتایا کہ لہیہ سے سات کلومیٹر کی دوری پر واقع علاقے میں فوجی گاڑی کو حادثہ پیش آیا جس کے نتیجے میں نو فوجی شدید طورپر زخمی ہوئے ۔انہوں نے بتایا کہ زخمی اہلکاروں کو علاج ومعالجہ کی خاطر نزدیکی ہسپتال منتقل کیا گیا تاہم وہاں پر تعینات ڈاکٹروں نے جونیئر کمیشنڈ آفیسر سمیت نو کو مردہ قرار دیا۔
دفاعی ذرائع نے مزید بتایا کہ فوجی جوان کیاری لہیہ کی طرف جار ہے تھے کہ راستے میں ہی دلدوز حادثہ پیش آیا ۔ذرائع نے بتایا کہ اس بھیانک حادثے میں مزید دو اہلکار زخمی ہوئے ہیں جن کی حالت بھی تشویشناک بنی ہوئی ہے۔

دریں اثنا لہیہ میں فوجی گاڑی کو پیش آئے حادثے پر سیاسی ، سماجی تنظیموں نے رنج وغم کا اظہار کرتے ہوئے لواحقین کے ساتھ تعزیت کا اظہار کیا ہے۔ مرکزی وزیر دفاع راجناتھ سنگھ نے اس حادثہ پر رنج و غم کا اظہار کیا ۔

انہوں نے ٹویٹ کرتے ہوئے کہا کہ" لداخ میں لیہہ کے قریب ایک حادثے کے نتیجے میں بھارتی فوج کے جوانوں کے نقصان پر غمزدہ ہوں۔ ہم اپنی قوم کے لیے ان کی مثالی خدمات کو کبھی فراموش نہیں کریں گے۔ میرے خیالات سوگوار خاندانوں کے ساتھ ہیں۔ زخمی اہلکاروں کو فیلڈ ہسپتال منتقل کر دیا گیا ہے۔ ان کی جلد صحت یابی کی دعاگو۔"

قبل ذکر ہے کہ یہ حادثہ کرگل دراس علاقہ میں ہوئے ایک پُراسرار دھماکے کے ایک روز بعد پیش آیا۔ اس دھماکے میں تین لوگ ہلاک جبکہ 10 دیگر زخمی ہوئے تھے۔اس حوالے سے مزید تفصیلات کا انتظار ہے۔