پیر کو راجناتھ سنگھ کا دورہ کشمیر

مرکزی وزیر دفاع راجناتھ سنگھ پیر کے روز جموں و کشمیر کا یک روزہ دورہ کریں گے اس دوران وہ خطہ لداخ کے سرحدی علاقوں بالخصوص سیاچن گلیشیئر کا دورہ کرکے سکیورٹی کی صورتحال کا جائزہ لیں گے۔

محض چند روز قبل ملک کے وزیر دفاع کا عہدہ سنبھالنے والے راجناتھ سنگھ کا یہ بحیثیت وزیر دفاع کسی بھی ریاست کا پہلا سرکاری دورہ ہے۔

تاہم موصوف سابقہ حکومت میں بحیثیت وزیر داخلہ قریب دو درجن سے زائد بار جموں و کشمیر کے دورے کیے تھے۔

دفاعی ذرائع نے وزیر دفاع کے دورہ جموں و کشمیر کی اطلاع دیتے ہوئے بتایا کہ 'راجناتھ سنگھ پیر کو خطہ لداخ کا دورہ کریں گے۔ وہ اگلی چوکیوں پر تعینات فوجیوں کے ساتھ بات چیت کریں گے اور سیاچن وار میموریل پر حاضری دے کر ملک کی حفاظت کے لیے جان قربان کرنے والے اہلکاروں کو خراج عقیدت پیش کریں گے۔'

انہوں نے مزید بتایا کہ 'وزیر دفاع سیاچن بیس کیمپ میں سیاچن گلیشیئر پر انتہائی نامساعد موسمی حالات کے باوجود ملک کی حفاظت کے لیے تعینات فوجیوں سے انفرادی و اجتماعی طور پر بات چیت کریں گے۔'

تفصیلات کے مطابق وزیر دفاع راجناتھ سنگھ کے ہمراہ فوجی سربراہ جنرل بپن راوت اور دیگر سینیئر فوجی افسران بھی موجود ہوں گے۔