Ladakh UT Foundation Day: صدر ہند لیہہ پہنچی، یو ٹی یوم تاسیس تقریب میں کی شرکت

لداخ سمیت جموں و کشمیر میں بھی یونین ٹیریٹری یوم تاسیس کی نسبت سے تقاریب منعقد کی جا رہی ہیں۔

سرینگر (جموں و کشمیر):صدر جہوریہ دروپدی مرمو منگل کے روز اپنے دو روزہ دورے پر مرکز کے زیر انتظام لداخ پہنچ گئی۔ وہ آج ’’یونین ٹیریٹری یوم تاسیس‘‘ (Union Territory Foundation Day) کی تقریب میں حصہ لے رہی ہے اور آئندہ روز سیاچین کا دورہ کریں گی۔ لداخ انتظامیہ کے ایک افسر نے ای ٹی وی بھارت کو بتایا کہ ’’صدر جمہوریہ کا استقبال لداخ کے لیفٹیننٹ گورنر، سی ای سی لیہہ، سی ای سی کرگل نے لیہہ ہوائی اڈے پر کیا۔ انہیں گارڈ آف آنر بھی پیش کیا گیا۔‘‘

آفیسر کا مزید کہنا تھا کہ ’’وہ (صدر جمہوریہ) آج لیہہ میں یونین ٹیریٹری یوم تاسیس کی تقریبات میں شرکت کریں گی اور کل سیاچن بیس کیمپ کا دورہ کریں گی جہاں وہ فوجیوں سے بات چیت بھی کریں گی۔‘‘ صدر جمہوریہ کے دورے کی تفصیلات فراہم کرتے ہوئے افسر کا کہنا تھا کہ ’’آج وہ لیہہ میں اپنے اعزاز میں دیے جانے والے شہری استقبالیہ میں شرکت کریں گی۔ صدر ایس ایچ جی کے ارکان اور مقامی باشندوں سے بھی بات چیت کریں گی۔

واضح رہے کہ جموں کشمیر سمیت لداخ میں بھی یو ٹی فاؤنڈیشن ڈے کی نسبت سے سرکاری سطح پر تقاریب منعقد کی جا رہی ہے۔ چار سال قبل آج ہی کے دن یعنی 31اکتوبر 2019کو پارلیمنٹ میں 5اگست 2019کو پاس کیے گئے تنظیم نو قانون کا اطلاق عمل میں لایا گیا تھا۔ تنظیم نو قانون نافذ ہونے سے نہ صرف جموں و کشمیر، جس میں لداخ بھی شامل تھا، کی نیم خود مختاری دفعہ 370کو منسوخ کیا گیا بلکہ سابق ریاست دو یونین ٹیریٹریز میں منقسم کیا گیا۔