'جب تک ہمارے حقوق بحال نہیں کیے جاتے، ہم پیچھے نہیں ہٹیں گے'

شفقت وٹالی نے کہا کہ این سی عوام کے حقوق کی بحالی کے لیے اپنی کوششیں جاری رکھے گی۔

جموں و کشمیر کے ضلع کپواڑہ کے ہندواڑہ علاقے میں نیشنل کانفرنس کی جانب سے ایک اجلاس منعقد کیا گیا۔ تقریب میں این سی رہنماوں کےساتھ ساتھ اعلی رہنما شفقت وٹالی بھی موجود رہے۔

شفقت وٹالی نے کہا 'ہم اپنے حقوق کو واپس حاصل کرنے کے لیے لڑتے رہیں گے اور اپنی جدوجہد جاری رکھیں گے۔ ہماری لڑائی عوام کی لڑائی ہے۔ نینشل کانفرنس واحد ایک جماعت ہے جو دفعہ 370 کو واپس لانے کے لیے لڑتی رہے گی'۔

انہوں نے کہا 'کچھ روز قبل دہلی میں جو کل جماعت اجلاس منعقد ہوا تھا۔ اس میں بھی این سی نے خطے کی خصوصی پوزیشن کی بحالی کا مطالبہ کیا ہے۔ دفعہ 370، 35اے کے ساتھ جتنے بھی حقوق ہم سے چھینے گئے، ان کی بحالی کی مانگ جاری رہے گی'۔

انتخابات کے حوالے سے بات کرتے ہوئے وٹالی نے کہا 'انتخابات میں حصہ لینا ہے یا نہیں، وہ اعلی قیادت فیصلہ کرے گی۔ اس کے علاوہ این سی عوام کی نمائندگی کرتی رہے گی'۔