پکڑے گئے نارکو-ٹیرر ماڈیول کا پاکستانی ہینڈلرز سے لنک تھا: ایس ایس پی کپوارہ

ایس ایس پی کپواڑہ نے کہا کہ مدثر احمد نام کے ایک نوجوان کو گرفتار کر کے آٹھ کلوگرام منشیات برآمد کی گئی ہے جس کی بین الاقوامی بازار میں قیمت پچاس کروڑ روپے سے زیادہ ہے۔

پولیس نے شمالی کشمیر کے ضلع کپوارہ میں ایک نارکو ماڈیول کا پردہ چاک کر کے آٹھ کلو گرام منشیات، جس کی بین الاقوامی بازار میں قیمت قریب پچاس کروڑ روپے ہے، ضبط کرنے کا دعویٰ کیا ہے۔

ایس ایس پی کپوارہ سندیپ چکرورتی نے ایک پریس کانفرنس کے دوران کہا کہ پولیس نے ایک مصدقہ اطلاع موصول ہونے پر کارروائی کرتے ہوئے ایک نارکو مڈیول کا پردہ چاک کر کے آٹھ کلو گرام منشیات، جس کی قیمت قریب پچاس کروڑ روپے ہے، ضبط کی ہیں اور ایک عسکری اعانت کار کو گرفتار بھی کیا ہے۔ گرفتار شدہ کی تصدیق مدثر احمد لون ساکن کیرن بالا کے بطور ہوئی ہے۔

انہوں نے کہا کہ اس ماڈیول میں ملوث دیگر افراد کی شناخت کی گئی ہے اور انہیں گرفتار کرنے کی کوششیں جاری ہیں۔

سندیپ چکرورتی نے کہا کہ اس ماڈیول کا پاکستانی ہینڈلرس کے ساتھ رابطہ تھا اور یہ ماڈیول منشیات کے کاروبار کے علاوہ وادی میں عسکری کارروائیوں کی مالی مدد کرنے میں ملوث تھا۔

انہوں نے کہا کہ یہ ماڈیول وادی میں عسکری سرگرمیوں کو فروغ دینے پر کام کر رہا تھا اور نوجوانوں کو عسکری صفوں میں شمولیت اختیار کرنے پر ورغلا رہا تھا۔

ان کا کہنا تھا کہ اس سلسلے میں پولیس اسٹیشن کرال پورہ میں ایک کیس درج کر کے مزید تحقیقات شروع کی گئی ہے۔