Bear Attack In Kupwara ترہگام کپواڑہ میں ریچھ کے حملے میں کمسن سمیت دو زخمی

کپواڑہ کے ترہگام علاقہ میں پیر کی شام کو ایک ریچھ نے ایک کمسن سمیت دو افراد کو زخمی کیا ہے۔ زخمیوں کو علاج و معالجہ کے لیے نزدیکی ہسپتال میں داخل کیا گیا ہے۔

کپواڑہ:سرحدی ضلع کپواڑہ کے ترہگام علاقے میں ریچھ نے پیر کی شام کمسن سمیت دو افراد کو زخمی کردیا۔ اطلاعات کے مطابق ترہگام کپواڑہ میں اس وقت سنسنی کا ماحول پھیل گیا جب ریچھ نے دو افراد پر حملہ کرکے انہیں شدید طورپر زخمی کر دیا۔

معلوم ہوا ہے کہ چیخ و پکار کی صدائیں بلند ہونے کے ساتھ ہی آس پاس کے رہائش پذیر لوگ جائے موقع پر پہنچے اور زخمیوں کو طبی امداد کی خاطر نزدیکی ہسپتال منتقل کیا۔ زخمیوں کی پہچان 48 سالہ فاطمہ بیگم زوجہ امین ملک اور 4 سالہ فہیم احمد ولد ملک رشید کے بطور ہوئی ہے۔

بتادیں کہ گزشتہ روز ہی شمالی کشمیر کے ہندواڑہ میں تیندوے نے ایک کمسن بچے کو نوالہ بنایا۔ جنگلی جانوروں کی جانب سے شہریوں پر لگاتار حملوں کے پیش نظر لوگوں میں فکر وتشویش کی لہر دوڑ گئی ہے۔

بتادیں کہ وادی کشمیر میں جنگلی جانوروں کا انسانی بستیوں میں نمودار ہونے کا سلسلہ جاری ہے۔ دیہی علاقوں کے ساتھ ساتھ شہری علاقوں میں بھی جنگلی جانوروں کی نقل وحمل کے باعث لوگوں میں فکر وتشویش کی لہر دوڑ گئی ہے۔ امسال جنگلی جانوروں کے حملے میں کئی افراد اپنی جانیں گواں بیٹھے ہیں، جب کہ کئی افراد کو ان جنگلی جانوروں نے شدید زخمی کردیا ہیں۔

(یو این آئی مشمولات کے ساتھ)