ڈگری کالج ہندواڑہ میں طلبہ کا احتجاج، سبھی کو داخلہ فراہم کرنے کا مطالبہ

شمالی کشمیر کے ضلع کپواڑہ میں ڈگری کالج ہندواڑہ کے احاطے میں طلبہ نے محکمہ تعلیم کے خلاف احتجاج کرتے ہوئے سبھی طلبہ کو داخلہ فراہم کیے جانے کا مطالبہ کیا۔

پیر کو ڈگری کالج ہندواڑہ کے احاطے میں احتجاج کرتے ہوئے بارہویں جماعت میں گذشتہ مہینے کامیاب قرار دیے گئے طلبا و طالبات نے احتجاج کیا۔

احتجاج کر رہے طلبہ نے کہا کہ انہیں ڈگری کالج میں داخلہ نہیں دیا جا رہا ہے۔

اس ضمن میں پرنسپل ڈگری کالج ہندوارہ نے بتایا کہ اعلیٰ حکام نے ڈگرلی کالج میں صرف 960 طلبہ کو داخلہ دیے جانے کا حکمنامہ صادر کیا ہے، جبکہ انہیں تقریباًدو ہزار کے درخواستیں موصول ہوئی ہیں۔

پرنسپل نے بتایا کہ میرٹ اور سبجکٹ کے حساب سے طلبہ کو داخلہ فارم اجرا کیے گئے۔

ادھر احتجاجی طلبہ نے حیرت کا اظہار کرتے ہوئے کہا کہ ’’جن طلبہ نے کم نمبرات سے بارہویں جماعت کا امتحان پاس کیا وہ کدھر جائیں گے؟‘‘

طلبہ نے محکمہ تعلیم سے ڈگری کالج میں طلبہ کی گنجائش میں اضافہ کرنے اپیل کی تاکہ ’’طلبہ کا مستقبل تاریک ہونے سے بچ سکے۔‘‘