سرینگر: دسہرہ کے موقع پر، بھارتی فضائیہ کے سربراہ ائیر چیف مارشل وی آر چودھری نے منگل کے روز جموں و کشمیر کے اوڑی اور کپواڑہ سیکٹروں کا دورہ کیا۔
بھارتیہ فضائیہ کے ایک افسر نے ائیر چیف مارشل کے دورے کی تصدیق کرتے ہوئے ای ٹی وی بھارت کو بتایا کہ" وہ آج صبح اوڑی اور کپواڑہ گئے تھے۔ وہاں اُنہوں نے لائن آف کنٹرول پر واقع فوج کی چوکیوں کا دورہ کیا۔"
اُن کا مزید کہنا تھا کہ" اُنہوں نے وہاں تعینات فوجیوں کو دسہرہ کی مبارک باد دی اور اُن کی حوصلے افزائی کی۔ اُنہوں نے گزشتہ برس بھی دیوالی کے موقعے پر لائن آف کنٹرول کا دورہ کیا تھا اور وہاں تعینات جوانوں سے گفتگو بھی کی تھی۔"
قبل ذکر ہے کہ گزشتہ ہفتے ضلع کپواڑہ کے کریں سیکٹر میں پاکستان کی جانب سے سنیپر فائرنگ میں ایک سپاہی زخمی ہوا تھا،جس کے بعد وہاں فوج کو لائن آف کنٹرول کی نگرانی مزید کڑی کرنے کی ہدایت دی گئی تھی۔